LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

La reveni a la des-sete

par Violeta Parra

traduida par Patrick Chevin

Reveni a la des-sete
pos vive ja un sentenio
es como desifri senias
sin es saja, competente,
redeveni surprendente
tan frajil com’ un secondo,
reveni a senti profonda
como, ante Dio, l’enfante,
esta es cual me senti stante
en esta tan fertil momento.
Lo vade torsente e torsente,
como en la mur la edera,
lo vade jermente e jermente,
como la mos en la petra,
como la mos en la petra,
ai! si si si
Me paso retrosedida
e lo de vos avansada,
la arco de la aliadas
ia penetra en me nido,
e lo, tota colorida,
ia pasea tra me venas,
e asta la dur cadena
con cual fisa la destina
es como la calma lumina
de un diamante en se rena.
Lo vade torsente e torsente,
como en la mur la edera,
lo vade jermente e jermente,
como la mos en la petra,
como la mos en la petra,
ai! si si si
Esta cual la senti pote,
no ia pote la conose,
e no la plu clar diagnose,
e no la plu larga mente,
tota cambia la momento,
como un majiste egosa,
lo dulse distanti nos
de odia e de violentia,
sola l’ama con se siensa
fa nos es tan inosente.
Lo vade torsente e torsente,
como en la mur la edera,
lo vade jermente e jermente,
como la mos en la petra,
como la mos en la petra,
ai! si si si
La ama es un vortis
de puria orijinal,
an un feros’ animal
xuxa se canta a la cores,
reteni peregrinores
e libri la prisonida,
la ama curante fa
un vea deveni xica,
sola la ama fa malia
deveni virtua e sinseria.
Lo vade torsente e torsente,
como en la mur la edera,
lo vade jermente e jermente,
como la mos en la petra,
como la mos en la petra,
ai! si si si
Como encanta, la cortina
ia abri completa, subita,
la ama ia entra vestida
com’ un tepida matina,
a se bela sona de svelia,
ia fa brota la jasmin,
a la siel’ com’ un serafin
vola pone orealetas,
e me anios a des-sete
ia converti la cerubin.
Lo vade torsente e torsente,
como en la mur la edera,
lo vade jermente e jermente,
como la mos en la petra,
como la mos en la petra,
ai! si si si

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:15 UTC).