Pensas rimada

I

Me ia deside comensa scrive
sur mea vive, tal la dotor a me
ia prescrive lo,
me ia prende la pluma
per parla de amor,
per dona color
a esta vive difisil
car me no es un abandonor.

Algas prefere basi la testa,
me sabe ce a veses esta vive apesta,
la mente no resta e atesta sur la problemes,
me lansa esta parolas con un balesta
afin tu comensa ata e lasa a otras la teoremes.

Me conose la vinses e vinsedas, la difisilias,
ma para perde tua tempo,
de tu depende la comensa de la move,
me vole promove tua motiva,
on ave alternativa a un vive de tristia,
donce comensa es plu ativa,
move tua corpo e sorti
de tua zona de comforta,
oblida tua disposa negativa
car la vive es tro corta,
a ci importa lo cual va pensa la otras?
porta con tu tua motivas
suporta la dias sin joia
tu es tua apoia,
oblida la paranoia, la noia,
sorti, oblida la temes
e comensa fa istoria.

II

Sorti de tua mundo imajinal
un vive con teme no es un vive normal,
oblida la angusa e la ansia,
la turba cual disturba tua pas,
esta poesia es la paransia
cual tu ia nesesa,
la ambulansia cual porta tu
a un loca do tua pensas ansiosa
va sesa.

Identifia la sacrifia cual tu debe fa
e tu va crea tua califia pos un tempo de luta,
per trova tua propria sinifia es astuta,
modifia tua pensas e atas,
per tua vive,
lo no es barata ateni nosa sonias
a veses on ave insonia,
a veses malsonias,
an tal, en tua vive, trova la bonia
e deside cual es la causa de tua joia.

III

Cual es tua ojeto?
Leva la peto e luta,
sorti de la leto,
la vive no es sempre
festa e confeto,
no lasa ce opinas de otras
es un corseto per tua libria,
on ave no person sin defeto,
donce sorti e vive.

Me sabe la efeto de teme en tua cor,
ma ata, ata ante deveni un sceleto,
usa tua inteleto,
la vive pasa como un jeto, como un roceto,
no perde lo restante en tua leto,
sorti de tua geto mental,
lo es egal la opina de otras,
vive sin importa par acel
e tua vive va es monumental.

IV

La pas pos la tormenta,
lo pare ce lo ariva lenta,
an si tu es temosa tu debe atenta,
la venta ia porta la nubes distante,
me es ancora laborante contra tristia,
abituante me a luta contra la pensas acusante,
plorante, plorante a cada dia par causa de teme,
oblidante esta silentia xiliante.

Me no sabe ce esta vive ave lojica,
ma me lasa sorti mea pensas con esta metrica,
per luta contra mea pensas me lasa los asi scriveda,
asi cisa los va deveni afonica,
me ave la cor creveda, la coraje disolveda,
lo pare ce teme es en mea cor enscriveda,
ma me sabe ce per sorti me debe pasea vias nonpaveda.

No escuta la menasas e temes de tua mente,
cual conose tua sentis,
no escuta sua mentis,
si tu nesesa lo, asenti
e sola pensa en la presente,
cambia la ambiente,
lasa crese la foco ardente
ci dise a tu ce tu es asendente,
ce tu ave un presente
e un futur si tu controla tua mente.

Lo pare ce la pas ariva nunca,
an tal tu sola nesesa respira,
asi tu va trova la sorti,
oblida la temes e comensa vive en felisia,
lo es en tua mente ce la joia inisia.

V

Me resta sola en mea sala,
con la pensas en mea mente,
un prison nonvidable,
un pas nonatenable,
me regarda mea refleta en la miror,
me sabe ce me es la autor de esta situa,
me crede ce me ia abitua a asentua
problemes cual no esiste, a crea mea propre teror,
lo ia pare ce de depresa me es un aderor.

Me resta sola, sola en esta sala,
me demanda do me ta vola si me ave alas,
me oblida ce la vive es un regala,
e ce si on no atende la tristia
en nosa cores instala se.

Lo es sufisinte, me cria a la miror,
me es faminte de vive sin teme,
de lasa vive esta vive esente un sufror,
me vole vive sin escuta la rumor
cual dise ce me no va pote,
me va pote fini con mea torturor.

Si me teme, lo es car me anela reali mea sonias,
me sabe ce sola me scrive mea istoria,
lo pare paranoia car lo sembla ce la memoria
porta a me recordas mal e paranoias,
ma me no escuta ja la pensas de vinseda,
la coraje sorti ja de do lo ia es ascondeda,
cuando me ia pensa ce tota ia es ja perdeda,
me vide me en la miror e cria,
oji es la dia de comensa,
oji es la dia en cual me deside vive un vive intensa,
me dona a me lisensa per oblida tota acel pensas
cual ia dise ce fali es tan serta como siensa.

Me sorti ja, e pasea,
me no vole perde esta odisea
e an si a veses me senti nausea,
me ia deside amorti la vose cual critica me,
corti sua mesajes e baldoni los,
de aora mea mente va forti me.

VI

Me cade, e cade, e cade denova,
la mesma pensas cual destrui mea person,
la pensas cual dise a me “Sede”,
la prison de cual me no pote sorti,
protejeda par un garnison de teme,
la foson en cual me ia cade
cual ia reforti mea preteme.

La problem es ce mea mente veni con me,
me no pote fuji de sua parolas asustante,
lo es un luta constante contra lo
ci fa sembla un elefante
alga cosa nonimportante.

On ave dias en cual on ave no desira
de continua esta luta ma me amira tu
cuando me vide ce tu esta versas escuta,
tu sola nesesa respira, iniora la parolas de conspira
tu sabe ce la rota jira e la dias de felisia va ariva.

E la foco de duta pare arde tu
como si tu es en un pira,
ma tu sabe ce tu pote retira acel pensas,
escuta esta barde cual dise ce tu no es un coarde,
ce lo compensa luta contra nosa temes,
car un futur nova va apare
en cuando tota acel pensas desapare.

Si, me cade, me sabe ce me va cade,
ma me va leva e revade,
jeta me a cual es nonconoseda sin paracade,
car esta vive ia es donada a nos per es viveda.

VII

Tan multe teme, tan multe pensas,
tan multe crede ce tota va aveni mal,
mea ego ia causa mea dementia,
mea perfetisme ia causa mea noncontentia,
me no ia ata usante como escusa la eselentia,
e lo ia deveni un parte de mea identia: fa no cosa,
o fa lo con tan multe lentia,
lo ia es ja un insulta a la intelijentia,
cuando me clui en mea pensas
es cuando me plu nesesa Tua presentia.

E oji me sabe ce alga cosa fada es plu bon ca no cosa,
ce on no pote vive temosa de lo cual pote aveni mal,
ce a cada dia on avansa en dirije a nosa final,
ce es ansiosa per la futur es lo cual causa esta dole adomenal,
lo no es normal, vive con tan multe teme,
si tu nesesa lo demanda aida psicolojial
ma tua sania mental es plu importante
me es laborante a cada dia per sorti de acel zona abisal.

VIII

A alga veses me ia nesesa asentia,
per naviga en la pensas de mea mente,
me nesesa es presente en esta presente,
oblida la futur e la pasada e trova contentia
en la corentia, fujinte de dementia.

Ma a otra veses me nesesa tua besas,
tua abrasas cual es como brasas,
caldinte la fria cual no sesa,
de cual me es sua presa,
me nesesa ance tua caresas
e me confesa ce con grasias a tu
me ia pote fini con mea depresa.

Me tan rompeda, par causa de esta pensas,
cual es causa de mea insonia,
causa de mea vergonia
causa de mea vagabonia
entre recordas cual me no pote cansela
e temes cual tota males consela.

Me sabe lo, a veses lo es difisil es con me,
me sabe lo, a veses lo es plu fasil abandona
per esta me demanda pardona,
ma me sabe ce esta tempo
es alga cosa cual Dio dona a nos.

A alga veses joia,
a alga veses tristia,
ma me sabe ce sempre tu es mea apoia,
cuando me surie
e cuando la larmas moia mea fas,
ce tu sabe leje su la surfas
e ce tu resta con me en tempos de noia.

IX

Cuando tu crese, e vide ce la vive segue,
ce on persegue nosa sonias e fuji de la demones.
e nos es persegueda par malsonias
e no ave tempo per ole la begonias de la jardin
la gusta asida pleni mea boca como la sabori de limones,
an tal oji la sielo ave un color alga verdin,
como a cada dia nova sorti la sol denova,
me perde me en la folias sedin con la fas en la cuxin
soniante ce me no es asi sola.

Ma realia es asi per resta,
me es fatigada e ave dole de testa,
me clui me oios e pensa
ce me es perdeda en un foresta,
ma me abri los denova
e pote atesta ce mea vive oji apesta.

No tota la dias es bon,
alga dias es asi per recorda tu
ce tu es vivente,
ce an si tua presente no es cual tu vole,
tu pote cambia tua dole si tu es volente.

X

Asi me lasa mea temes,
me no sabe perce esta a me susede,
me no crede, ce me ia nase con asusta
ma me crede ce me ia ajusta a esta vive nonjusta,
nosa mente no vole ce nos sufri,
ma me senti en mea peto esta combusta
ce dise a me ce la ora de teme ja ateni sua fini,
ce la custa de escuta la teme es no ave un vive,
ma mori en vive no es un negosia,
e ce tu no debe cura lo cual dise esta sosia.

Asi me lasa mea larmas,
los es la alarma cual dise a me
ce lo es ja la ora de prende la armas,
cisa un cosa de la carma,
o de la darma,
ma la ora de vive ariva ja a me,
ance a tu, esta parolas vole ce tu velia,
afin tu pote reconose la belia de vive,
oblida la cruelia ce la novas sempre descrive,
e mervelia con la cosas dial como algun naive.

Si, oji me dise adio a teme,
me no vole plu sustas, plu custas
tan multe alta, me prefere un vive plu justa,
e me salta a ante, a cada dia me es laborante,
vagante en esta mundo tan multe iniorante
de mea desiras, de mea sentis e mea aspiras,
vagante en esta mundo cual conspira
contra la joia e la felisia.

Asi me lasa mea temes,
me no vole trova los denova,
tal me ia deveni un person nova.

XI

Me no tolera plu esta vive tan multe triste,
esce tristia es la causa de mea esiste?
me es un adatiste ma me no abitua
a esta manca de altruisme,
a veses me es mea plu mal antagoniste,
me no es un conformiste
me vole vive mea vive sin defetisme.

XII

Me reveni asi per canta mea sentis,
esta es mea poesia en cual me no menti,
si tu demanda esce me es oce me asenti,
ma a interna me sabe ce me no pote contenti,
ce me pico a pico dementi,
e a veses me disenti con mea pensas,
par esta me documenti nosa conversas,
cisa asi me pote evidenti la vias cual me traversa.

E lo es un forma de folia mea dialogas,
mea mente volente evita la decaloga,
a veses la conversa deveni un dialoga,
lo va continua asta ariva al epiloga.

Car esta paper es mea psicolojiste,
me vole no drogas no otra forma de escapisme,
sola con la pluma e mea mente tan multe disturbada,
la poesia es mea medica, lo es mea curor tan multe amada.

Me vole fuji en cuando me es en mea sala,
la mures de la casa cade sur me,
me ta vole a alga dias ave alas,
per vola distante de asi, ai per me!
tal me comensa move la spalas,
cisa si me clui mea oios
me va vola a Valhala.

Car me vole fuji de esta temes constante,
me vole sorti de esta zona cual no es ja comfortante,
lo ia deveni un prison plu mal ca Txoson,
tro asfixiante.

Par esta en esta paper me fuji,
con inca mea pensas cruji,
mea temes ruji,
e me puri mea mente plen de suje.

Tu es poesia mea salva,
un valva per evade
cuando tristia mea cor invade.