LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

La capra de senior Segin

La capra de Senior Segin (“La Chèvre de monsieur Seguin”) es un nara corta par Alphonse Daudet. Esta tradui es par Sunido en 2011.

Senior Segin ia es nunca felis con se capras fema.

El perde tota de los en la mesma modo: a un matina bela, los rompe la se corda, vade a via en la montania, e ala a supra la lupo come los. No la caresas par se padron, e no la teme de la lupo, no cosa freni los. Lo pare ce los ia es capras autonom, ci vole per cualce costa la aira abrida e la libria.

La bon senior Segin, ci comprende no cosa sur la carater de se capras, es angusada. El dise:

“Acel es finida; la capras es noiada asta me, me no va conserva an un.

An tal, el no descoraji, e pos la perde de ses capras en la mesma modo, el compra un capra sete; ma a esta ves, el cura prende un capra tota joven, afin la capra abitua se per abita con el.

A! La capra peti de Senior Segin ia es tan bela! El ia es tan bela con se oios suave, se barbeta de suofisior militar, se ungias negra e briliante, se cornos raiosa e se pelo longa e blanca cual sembla a un jacon sin mangas! El ia es tan plasente como la capreta de Esmeralda, esce tu recorda? - e con esta, el ia es obedinte, caresante, lasante sin move ce on prende la se lete, sin pone la se pede en la bol. Un capreta tan amable…

Senior Segin ave a retro de se casa un ensirca con spinablancas a sirca. El pone ala la cliente nova.

El lia el a un palo, en la loca la plu bela de la prado, el cura lasa a la capra un grande longia de corda, e a alga veses, el veni per vide esce la capra vade bon. La capra trova ce el es multe felis, e el come la erbas con tan contentia ce Senior Segin es encantada.

- Final, - la om nonfortunosa pensa - ave asi un ci no va es noiada asta me!

Senior Segin ia era, se capra ia deveni noiada.

A alga dia, regardante la montania, la capra dise a se:

- A supra con sertia ta es tan bon! Acel ta es un tal plaser de brinca en la ericas, sin esta corda maldiseda cual despeli la colo!… La come de erbas en un ensirca es bon per la asino o per la bove!… La capras nesesa spasio…

De esta momento, la erba de la ensirca pare blanda a el. La noia veni a el. El magri, se lete rari. Con compatia on vide ce el tira sur se corda tra la dia intera, con la testa turnada a la montania, con la narina abrida, el dise Mee! con tristia.

Senior Segin persepi bon ce se capra ave un problem, ma el no sabe cual lo es… A un matina, en cuando la senior fini de prende se lete, la capra turna se e dise a el en se lingua:

- Escuta, senior Segin, me es noiada asta tu, lasa me vade a la montania.

- A! me Dio!… Ance el! senior Segin cria con stona, e par la colpa el lasa se bol cade; a pos, el senta sur la erba asta se capra:

- Como, Blanceta, tu vole abandona me!

E Blanceta responde:

- Si, senior Segin.

- Esce asi la erba manca a tu?

- O! no! senior Segin.

- Cisa tu es liada tro corta, esce tu vole ce me longi la corda?

- No acel no merita la labora, senior Segin. - Alora, cual tu nesesa? cual tu vole?

- Me vole vade a la montania, senior Segin.

- Ma, povre, tu no sabe ce on ave la lupo en la montania… Cual tu va fa cuando el va veni?… - Me va dona a el colpas de cornos, senior Segin.

- La lupo rie multe sur tu cornos. El ia come capras cual ia ave cornos plu grande ce los de tu… Tu sabe bon, Renalda, la capra vea e nonfortunosa ci ia es asi a la anio pasada? un capra xef, forte e perilosa como un capra mas. El ia combate la lupo tra la note intera… a pos, a la matina, la lupo ia come el.

- Miseria! Renalda povre!… Acel no importa, senior Segin, lasa me vade a la montania.

- Bon Dio!… senior Segin dise; ma cual cosa on fa sempre a me capras? Me ave denova un ci la lupo va come… Alora, no… me va salva tu contra tu vole, capra fol! e afin tu no rompe tu corda, me va enclui tu en la boveria, e tu va resta ala sempre.

Pos dise acel, senior Segin trae la capra en un boveria tota negra, de cual el clui se porte con du turnas de clave.

Nonfortunosa, el ia oblida la fenetra, e pronto pos cuando el reparti, la capra peti vade a via… Tu rie? Par Dio! Me vide bon; tu es un partisan de la capras, contra acel bon senior Segin… Ma nos va vide pronto, esce tu va continua rie.

Cuando la capra blanca ariva en la montania, acel es un encanta jeneral. Nunca la abetos vea ia vide alga cosa tan bela. La capra deveni resetada como un rea peti. La castanias inclina se asta la tera per caresa el con la estremas de se ramos. La jinestas de oro abri cuando la capra pasa, e los odori tan bon como los pote. Tota la montania selebra el.

Tu imajina, como nos capra ia es felis!

No corda plu, no palo plu… no cosa cual impedi el brinca, impedi el come como el vole… Ala on ave tan erbas! asta supra la cornos, me cara!… E como es la folias! Saborosa, delicata, sierin, fada con mil plantas… Acel es vera un otra cosa ca la folias de la ensirca. E tal flores!… Campanulas alta e blu, dijitales purpur con calixes longa, un foresta intera de flores savaje suprafluente con juses ebrinte!…

La capra blanca, dui ebra, frota se a en con la gamas a supra, e rola longo la inclinas, maraniada con la folias cadeda e la castanias… A pos, subita, con un salta, el sta denova sur se gamas. Op! Vide ala el partida, con la testa a ante, tra la boscetas e la buxes, a veses sur un culmine, a veses en la fondo de un canion, ala a supra, a basa, en tota locas… On ta pote crede ce lo ave des capras de senior Segin en la montania.

Es vera ce Blanceta teme no cosa.

El salta supra rietas deluviante cual salpica el con polvo umida e spuma cuando el pasa.

Alora, intera moiada, el vade per reclina sur alga roca plata, e fa se seci par la sol… A un ves, en cuando el avansa sur la borda de un plano alta, con un flor de sitiso entre la dentes, el persepi a basa, tota a basa en la plano, la casa de senior Segin con la ensirca a retro. Acel fa el rie asta la larmas.

- Acel es tan peti! el dise; como me ia pote es contenida a en?

La compatiada! Par vide ce el es perxinte tan alta, el crede a la min es tan grande como la mundo…

En soma, acel ia es un bon dia per la capra de senior Segin. Sirca la media-dia, corente asi e ala, el trova un manada de camusas mas cual es cracinte un vite savaje con tota se dentes. Nos aventuror peti en roba blanca stimula los. Los dona a el la loca la plu bon a la vite savaje, e tota esta seniores es multe brava… An lo pare, - esta debe resta entre nos, - ce un camusa joven con un pelo negra ia ave la fortuna de plase a Blanceta. La du amores ia vaga en la bosce tra un o du oras, e si tu vole sabe cual los ia dise la un a la otra, vade per demanda lo a la fontes parletante cual flue nonvidable su la mos.

Subita la venta fresci. La montania deveni violeta; lo es la sera.

- Ja! la capra peti dise; e el para multe stonada.

A basa, la campos afoca en la nebleta. La ensirca de senior Segin desapare en la nebla, e de la casa peti on vide sola la teto con un poca fuma. La capra escuta la campanetas de un manada cual on gida a retro, e el senti se spirito es tota triste… Un falcon blanca, cual reveni a se nido, tanje el con se alas. La capra trema…

A pos lo ave un ulula en la montania:

-Uu! Uu!

La capra recorda la lupo; tra la dia intera la fol no ia pensa sur el… A la mesma momento un trompa sona multe distante en la vale. Lo es esta bon senior Segin ci fa un atenta ultima.

-Uu! Uu!…la lupo cria.

- Reveni! reveni!…la trompa cria.

Blanceta ta gusta reveni; ma pos recorda la palo, la corda, la sepe de la ensirca, el pensa ce aora el no pote plu abitua se a acel vive, e ce la resta es plu bon.

La trompa no sona plu…

La capra oia a retro de el un ruido de folias. El turna se e el vide en la ombra du oreas corta, tota reta, con du oios cual brilia…

Esta es la lupo.

Enorma, nonmovente, sentante sur se parte retro, el es ala regardante la capra peti e blanca, e saborea el par la pensa. Car la lupo sabe bon ce el va come la capra, el no freta; sola cuando la capra turna se, la lupo comensa rie vil. - A! A! la capra peti de senior Segin! e el pasa la se lingua longa e roja sur se labios de esca.

Blanceta senti ce el es condenada… A un momento, el recorda la raconta de la Renalda vea, ci ia es combatente tra la note intera e ci final ia deveni comeda a la matina; el pensa ce ta es plu bon lasa se deveni comeda sin espeta; ma pos cambia la se opina, el pone se en garda, con la testa basa e la cornos a ante, como un capra corajosa de senior Segin, ci el es… No car el espera mata la lupo - la capras no mata la lupo - ma sola per vide esce el va pote resiste tan longa como Renalda…

Alora la monstro avansa, e la cornos peti comensa la combate.

A! como la nos capreta corajos es combatente con tota se fortias! A plu ce des veses, me no menti, el forsa la lupo vade a retro per reprende la se respira. Tra acel sesacombates de un minuto, la amacome prende denova con freta un poca de se erba cara; a pos el revade a la combate, con la boca plen… Acel dura tra la note intera. De tempo a tempo la capra de senior Segin es regardante la stelas dansante en la sielo clar e el dise a se:

- O! ta ce me resiste asta la lus prima…

La un pos la otra, la stelas estingui. Blanceta dupli la se colpas de cornos, la lupo dupli la se colpas de dentes… Un lus pal apare a la orizon… La canta de un gal mas roncin asende de un cultiveria.

- A fini! la bestia nonfortunosa dise, ci espeta sola la dia per mori; e el reclina a tera en se pelo blanca, tota manxada par la sangue…

Alora la lupo lansa se sur la capra peti e come el.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:14 UTC).