Ecuador eleje un bancor conservaliste per presidente

Guillermo Lasso, conservaliste e bancor pasada, ia gania la eleje presidental en Ecuador pos un revota desegalinte. Sua oposor, la economiste sinistriste Andrés Arauz, ia aseta sua defeta a mera oras pos la clui de voterias a soldi.

Pos la conta de cuasi tota, 52,4% de la votas ia es ganiada par Lasso en compara con 47,6% par Arauz.

Lasso, ci ave 65 anios e ia aspira la presidentia a tre veses, ia dise a sua suportores ce el aseta “la defia de cambia la destina de nosa pais”.

Sua oposor ave 36 anios e ia gania la ronda prima a 7 febrero par 10 persentos. Asta resente, el ia es favoreda per deveni presidente. Ma sondas ia sujesta ce Lasso ia comensa egali el en la promoves tarda.

Arauz ia descrive la resulta como “un tropeza elejal, ma no un defeta political o moral”. El ia dise ce aora es la tempo per “progresa, construi pontes e crea acorda”.

Lasso, ci ia fini en loca du en la elejes presidental de 2013 e 2017, va es induida a la posto a 24 maio. El ia promete separa de la politicas sinistriste de governas pasada, sur cual el dise ce los ia tira Ecuador a su.

“Ecuadoranes ia usa sua direto de vota per eleje un curso nova, multe diferente de lo de la 14 anios pasada,” el ia comenta.

El dise ce el va atrae plu investis stranjer, va crea du milion empleas nova e va aumenta la produi de petrolio. El ia proposa ance leva la salario mensal minima, introdui un redui de impostas per comersias peti, e crea un reserva per stimula emprendores.

An si on vide Lasso como representante la setor comersial de la pais, en sua parla vinsente el ia atenta dirije se a campos plu vasta de sosia, disente ce el vole ce sua governa escuta “tota ecuadoranes”.

El ia dise ce el va labora sin sesa per defende la diretos de femes, incluinte madres sin sposo e adolesentes ensinta, e ce el intende fini discrimina contra persones lgbt. “Ta ce nos construi un pais plu justa e rica per tota,” el ia declara.

Lasso va prende la presidentia de Lenín Moreno, de ci sua popularia ia cade de 77% corta pos sua eleje en 2017 asta sola 7% en febrero 2020.

La presidente nova va debe trata la crises jemelo de economia e sania en Ecuador. Longo la banco sentral de la pais, la economia ia contrae par 7,8% en 2020, e datos de la Instituida Nasional de Statistica e Conta ia mostra ce un dui de milion persones ia es nonempleada en janero de la anio corente.

Acusas sur froda en la ministreria de sania ia causa un retarda de cuasi du menses en prepara un scema nasional per vasini contra covid. La ministro sinco de sania en cuatro anios ia parti de sua posto en la semana pasada.