AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
14 janero 2020
En la parte norde-ueste de Xina sentral, a la min ses persones ia mori e 16 ia es ferida cuando un dolina grande ia engoli un bus e alga paseores.
La buco ia apare en la strada a la sera de ier, estra un ospital en Xining, la capital de la provinse Qinghai.
Video vijilante mostra un esplode en la dolina, corta pos cuando la bus e persones prosima ia cade a en. Persones stante a un parabus ia es obligada a core a via cuando la tera su la bus ia cade subita.
Alga persones ia asembla per atenta salva la pasajores, ma los ia desapare en la buco cuando lo deveni subita plu larga.
La medias jornaliste governal dise ce la dolina ia ave cuasi des metres de diametre. On no sabe cuanto persones ia es en la bus a la tempo de la aveni.
Esta no es la caso prima de un dolina matante en Xina en anios resente. On culpa frecuente construerias e la rapidia de developa en la pais per la apare de los.
En 2018, cuatro persones ia mori cuando un buco ia abri en un troteria folida en la site Dazhou en la sude-ueste. E plu temprana par sinco anios, un aveni simil ia mata sinco persones en un compleso industrial en Shenzhen, un site sude.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).