Un avion cade sur un distrito abital de Karachi

Un avion portante 91 pasajores e oto ecipores ia cade ier sur un distrito abital la site Karachi en Pacistan. La moris de 97 persones es confirmada.

La causa de la cade es ancora no conoseda. La pilote ia reporta un problem tecnical pos un atenta falida de atera, e ia envia un clama per aida cuando la avion ia cade pos des plu minutos.

Esta ia aveni a poca dias pos cuando la pais ia permete la recomensa de volas comersial pos lejeri sua regulas de isoli contra la coronavirus.

La Airbus A320 de Pakistan International Airlines ia veni de Lahore e ia porta multe familias viajante ante la festa Eid al-Fitr doman. Lo ia atenta atera a la Airoporto Internasional Jinnah en Karachi a sirca 14:30 de ora local.

Lo ia es multe prosima a la perimetre de la atereria cuando lo ia colpa casas en la distrito Colonia Model. Imajes televisada ia mostra ecipos salvante ci xerca tra detrito sperdeda sur la stradas de esta zona densa poplada. Alga autos ia arde.

Jornales pacistani ia publici la conversa entre la controlores de trafica airal e la pilote, ci dise ce sua avion ia perde sua motores. Un controlor demanda esce lo va fa un “atera sur ventre”, e la pilote responde “mayday, mayday, mayday”.

Un ofisior de avioni ia sujesta ce la avion ia es cisa noncapas de basi sua xasi. Imajes sirculinte en redes sosial pare mostra marcas negrida su ambos motores, con no xasi vidable en prosimi a la airoporto.

Investigores va atenta retrae la rejistradores “caxa negra” per aida descovre la causa de la cade. On ia institui ja un comite investigante.

La airocompania ia dise ce la avion ia deveni un parte de sua flotila en 2014 e ia susede sua esamina de securia per vola en novembre pasada.