On proteje ominidos contra la coronavirus

On ia enclui multe primates grande contra la menasa de coronavirus. La turisme con gorilas en Africa es suspendeda, e refujerias per otra ominidos, como orangutanes sur la isola Borneo, es cluida per la popla jeneral.

Ance en esta semana, un proba a un tigre en la Zo Bronx en York Nova ia mostra ce el ave la virus. On ia institui metodos nova per proteje gatos grande e sua curores.

On no sabe esce ominidos pote developa la maladia, ma on ave un teme cresente ce esta primates, nosa relatadas vivente la plu prosima, es cisa egal perilida. Gorilas montanial es propensada a patojenes umana e pote developa maladias respiral.

Gorilas montanial es un spesie perilida de ominido cual on trova sola en la forestas de Ruanda, Uganda e la Republica Democrata de Congo. Tota tre paises ia esperia casos umana de coronavirus.

Veterinares e gardaforestas continua sua labora de cura gorilas montanial, ma con plu cautis. An ante la apare de la maladia, on ia demanda ce persones resta sempre a distantia minima de sete metres de la ominidos.

Conselas nova par la Uni Internasional per la Conserva de Natur recomenda un distantia de des metres, e la redui de visitas par umanas asta la minima nesesada per serti la securia e sania de la primates. No person ci es malada, o ia contata un person malada en la des-cuatro dias presedente, es permeteda a prosimi a los.

La perde de abitadas e la xasa nonlegal es menasas grave contra la survive de ominidos, ma viruses es ance un problem. Maladias comunicable es aora listada entre la tre menasas xef per alga grupos de primates grande. Rexerca pasada ia mostra ce ximpanzes pote developa la virus de rinofarinjite (la cataro comun), e on crede ce la virus ebola ia mata miles de ximpanzes e gorilas en Africa.

Cuatro tipos de ominido vive oji: gorilas, bonobos e ximpanzes en Africa, e orangutanes en Asia sude-este. Umanas es prosima relatada a los, avente un asendente comun a alga milion anios pasada.