AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

La mori de la renor la plu longa de la mundo arabi

11 janero 2020

Qabus bin Said al Said, la sultan de Uman e la renor la plu longa servinte en la mundo arabi, ia mori con 79 anios.

En 1970, la sultan ia despone sua padre en un colpa de stato sin sangue e ia pone Uman en via a developa, usante la ricia de petrolio de la pais. Jeneral regardada como popular, el ia es ance un monarca asoluta ci ia silenti voses disentinte. On ancora no ia declara sua causa de mori.

Sua cusin, Haitham bin Tariq al Said, es ja inaugurada como sua susedor. Esta ministro pasada de cultur e erita ia fa ier sua jura de posto, pos un consenta de la Consilio de la Familia Real.

La sultan es la desidor suprema en Uman. El teni ance la postos de ministro xef, comandor suprema de la fortes armada, ministro de defende, ministro de finansia, e ministro de esternas.

En desembre, Qabus – ci ia ave no eritor o susedor asiniada – ia pasa un semana en Beljia per tratas medical, e on ia reporta ce el sufri de canser.

Imajes mostra un fola de omes asemblada estra la Mascita Grande Sultan Qabus en la capital Mascat, a do on ia prende la caxon funeral e do on ia dise preas.

Tra cuasi sinco desenios, Qabus ia domina completa la vive political de Uman, un pais con 4,6 milion persones abitores, de ci sirca 43% es sitadanes stranjer.

Con 29 anios, el ia suverti sua padre, Said bin Taimur, un renor solitar e estrema conservaliste ci ia proibi multe cosas, incluinte escuta la radio e porta oculos de sol, e ci ia deside ci pote sposi, deveni educada o parti de la pais.

Qabus ia declara pronto ce el intende institui un governa moderna e usa mone de petrolio per developa la pais, en cual on ia ave a acel tempo sola tre scolas e des cilometres de stradas paveda.

En la anios prima de sua rena, aidada par soldatos spesial de Britan, el ia supresa un rebela en Dhofar, un provinse sude, par tribus suportada par la Republica Democrata Poplal de Iaman, alora un stato marxiste.

Descriveda como carismosa e previdosa, el ia segue un via neutral sur temas esterna, e ia susede en 2013 reali negosias secreta entre Iran e la Statos Unida cual ia gida a un acorda nucleal major pos du plu anios.

Un grado de noncontentia ia apare en 2011 con la Primavera Arabi. On ia ave no cambias vasta en Uman, ma miles de persones ia vade sur la stradas tra la pais per esije salarios plu bon, plu empleas, e la fini de frodas ofisial.

La fortes de securia ia tolera inisial la protestas, ma plu tarda los ia usa gas lacrimojen, baletas de cauxo e munis combatin per sperde los. Du persones ia es matada e desuples ia es ferida. On ia litiga sentos su leges cual ia criminali “asemblas nonlegal” e “insulta la sultan”.

La protestas ia fali produi cambias major. Ma Qabus ia desemplea alga ministros longa servinte ci on ia persepi como frodosa, ia estende la potia de la Consilio Conselante, e ia promete crea plu empleas en la campo publica.

De pos, la autoriosas ia continua bloci jornales local nondependente cual critica la governa, confisca libros, e menasa ativistes, como diseda par la organiza Oserva de Diretos Umana.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).