AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Jirafas rara es matada en Cenia

11 marto 2020

Du jirafas blanca e estrema rara ia es matada par xasores nonlegal en la norde-este de Cenia. Gardaforestas ia trova la corpos de la fema e sua enfante en un vileta en Contia Garissa.

Un jirafa blanca tre es ancora vivente. On crede ce el es la sola ci resta en la mundo.

Sua aspeta blanca es causada par un state rara, nomida leucisme, cual fa ce la selulas de pel ave no pigmento. La conose de esta jirafas ia sperde tra la mundo pos cuando on ia fotografi los en 2017.

La manejor de sua conserveria ia dise ce la vide la plu resente de la du jirafas matada ia aveni a plu ca tre menses ante aora.

“Esta es un dia multe triste per la comunia de Ijara e per Cenia intera,” el ia dise. “Nos es la sola comunia en la mundo ci garda la jirafa blanca. Sua mata es un colpa contra la pasos eselente fada par la comunia per conserva spesies rara e unica, e un clama per continua suporta laboras de conserva.”

On ancora no ia identifia la xasores, e sua motiva es nonclar. La Sosia per Viventes Savaje de Cenia, la organiza xef de conserva en esta pais de Africa este, ia dise ce lo investiga la matas.

La conserveria es en un rejion vasta sin sercas. Lo conteni ance viletas.

Jirafas blanca ia es prima oservada en Cenia en marto 2016, a sirca du menses pos un vide en Tanzania, pais visina. Sirca 40% de la popla de jirafas ia desapare en la 30 anios pasada, e la xasa legal per sua carne e pel continua, diseda par la Funda per Viventes Savaje de Africa.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).