Focones prosimi a la ruinas de Txornobil

Focones savaje cual arde ja tra alga dias en Ucraina norde es aora a distantia de sola du cilometres de la compleso nucleal ruinada a Txornobil. Un foco ia ateni Pripiat, la vila prosima cual ia servi la compleso en la pasada, aora ance abandonada.

La focon la plu grande ocupa 34 mil ectares, e un otra, a sola un cilometre de la compleso, ave 12 mil ectares de area.

Si la focones destrui Pripiat, persones local dise ce esta va dana grave sua economia, car visitas supravideda per turistes furni un revenu importante. En 2018, plu ca 70 mil persones ia visita, e la cuantia en la anio seguente ia es an plu alta, pos la susede de un drama televisada sur Txornobil.

La polisia dise ce la focon arde ja de la fini de semana de 4 april, cuando un om ia ensende erba seca prosima a la zona de esclui.

Plu ca 300 pompores labora a la loca, usante aparatos spesial, e ses elicotores e aviones atenta estingui la flamas de supra.

A 5 april, Iegor Firsov, la xef tempora de la departe de esamina ecolojial de Ucraina, ia dise ce la nivel de radia en la rejion ia aumenta notable supra la cuantia usual. Ma ofisiores de la governa ia rejeta esta, afirmante ce la radia en la rejion es “entre limitas normal”, e Firsov ia retira sua comentas.

La venta sofla aora la fuma de la focones en dirije a Ciiv, la capital.

Txornobil e Pripiat ia es abandonada en 1986, cuando un reatador nucleal a la compleso ia esplode. La desastre ia envia un nube radioativa supra multe de Europa, ma la rejion direta sirca Txornobil mesma ia es la plu grave afetada.

Nun es permeteda a abita plu prosima ca 30 cilometres de la sentro eletrical, cual es aora ensircada par un covrente de aser. Txornobil ia continua jenera eletrica asta la clui de sua reatador final en 2000.