Contrabandores de carton es caturada en Madrid

La polisia espaniol dise ce lo ia desbandi un gang criminal cual ia fura tones de carton dejetada de Madrid e ia contrabanda lo a paises asian.

Plu ca 40 gangores suspetada ia es arestada, suspetada de ofendes ambiental e blancis de mone. On acusa ce la gang ia transporta nonlegal plu ca 67 mil tones de dejetada, con valua de 10 milion euros. Multe de la dejetada ia es furada de baldones de resicli.

Un compania de maneja dejetadas, con adirije en Madrid, ia organiza de 2015 la colie nonlegal de paper e carton, la polisia ia esplica.

On estima ce la gang ia sutrae sirca 16 milion euros de la consilio de la site Madrid en forma de perdes de materias resiclable. Paper e carton deponeda en bancos es vendeda a complesos de resicli cual converti lo a sua materias cru.

La carton e paper furada ia es miscada con dejetadas legal colieda ante deveni transportada a paises en Asia sude-este, xef Xina, Barat, Indonesia e Corea Sude.

Fotos publicida par la polisia mostra un suspetada con sua gamas pendente de un baldon de resicli cuando el ia atenta fura la contenidas. Un polisior ia comenta a un jornal ce en “la rejiones la plu jusosa”, la gangores “ia vade per la paper a du veses per dia”.

De la 42 persones arestada, tre es sitadanes espaniol e la plu de la otras es de orijina romanian. Des-un camiones usada en la furas ia es ance saisida par la polisia.

La opera, gidada par la Garda Sivil Espaniol, ia es suportada par Europol, la departe de la Uni European per enforsa leges.

On ia lia crimines organizada con la industria de dejeta en alga paises european, de cual Italia es major. Un reporta par la UE en 2015 ia dise ce crimin organizada en Italia “fa un rol notable en la industria de maneja dejetadas, spesial en la campo de lasa dejetadas en locas nonlegal e contrabanda nonlegal internasional de dejetadas perilosa”.