AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Coleria en Brasil a un polisior ci sta sur un fem

14 julio 2020

En Brasil, du polisiores militar en la site São Paulo va es criminal acusada pos la televisa de imajes cual mostra ce un de los ia sta sur la colo de un fem de pel negra.

Pos acel, la vitim, un fem de eda media e la posesor de un bar peti, ia es tirada en securipolsos longo la troteria. La rejistra ia es fada par un person ci ia vide la aveni en maio.

La governor de stato, João Doria, ia dise ce el no va tolera tal maltratas, e ce ambos polisiores es aora desempleada. On no ia publici sua nomes. La governor ia ajunta ce 2000 membros de la polisia de São Paulo va debe usa cameras aponable aora.

La video ia es difusada en Fantástico TV en la finisemana pasada. Lo ia provoca un coleria notable en la pais, evocante la mori su aresta par polisia de George Floyd, un om nonarmada de pel negra, en Minneapolis, ance en maio.

En acel caso, un polisior de pel blanca ia es videda en ajena sur la colo de Floyd, an cuando Floyd ia dise ce el no pote respira. La mori de Floyd ia jenera un serie de protestas coletiva en urbes tra la SUA, violente a veses.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).