AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Australia rejeta la reclamas teritorial de Xina

27 julio 2020

Australia ia rejeta formal la reclamas teritorial e maral par Xina en la Mar Xina Sude, plu prosima aliniante se con la Statos Unida de America en un situa tensante.

En un declara a la Nasiones Unida, Australia ia dise ce la reclamas, cual pertine a la majoria de esta mar, ave “no funda legal”. Xina no ia reata. Plu temprana, la SUA ia descrive alga de la atas de Xina en la rejion com “nonlegal”.

En anios resente, Xina ia construi bases sur isolas artifis en la mar, disente ce sua diretos ia orijina a sentenios ante aora.

Brune, Malaisia, la Pilipinas, Taiuan e Vietnam oposa la reclamas par Xina. La paises disputa ja teritorio tra desenios, ma la tensa ia aumenta gradal en anios resente, e alga frontis marinal ia aveni.

Xina dise ce lo posese un rejion vasta, conoseda como “la linia de nove linietas” o “la lingua de bove” par causa de sua forma en mapas, e ia suporta sua reclama par construi isolas e par fa patrulias.

Lo ia cumula ala ance un infrastrutur militar notable, ma insiste ce sua intendes es pasosa.

Du arcipelagos en la rejion, la Isolas Paracel e la Isolas Spratly, es apena abitada ma ave cisa reservas de recursos sirca se. La mar es ance un via importante per barcones e ave pexerias major.

En 2016, un corte internasional ia deside contra Xina, disente ce on ave no atesta ce lo ia ave istorial la controla escluinte de la acuas o recursos de esta mar. Xina ia rejeta la judi.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).