Arceolojistes trova un sauna de sentenio 14 en Mexico

Un sauna antica de la americanes orijinal, con data de la sentenio 14, ia es descovreda par arceolojistes en la Site Mexico.

Composantes sentral de la sala de sua, do la banio o stange de vapor ia es locada, es ancora intata, la Instituida Nasional de Antropolojia e Istoria dise.

Nomida temazcales, esta strutures ia es construida par poplas nativa en Mesoamerica, e usada per intendes medisinal, per rituos spirital, e per la pari de bebes.

Esta descovre en La Merced, distrito istorial, ia aida espertas a determina la loca esata de Temazcaltitlán, un de la partes prima de Tenochtitlán, la urbe antica cual ia deveni la Site Mexico moderna.

La escavas ia revela ance la restas bon conservada de un casa construida pos la concista espaniol a sentenios plu tarda, con mures decorada con motifes roja. On crede ce lo ia es ocupada par un familia nobil nativa en la sentenio 16.

“La trovadas sujesta ce en la sentenio 16 esta rejion ia es plu poplada ca nos ia crede inisial,” Victor Esperón Calleja ia dise, ci ia gida la labora de escava.

Sua ecipo ia descovre ance la restas de un taneria cual ia sta ala probable entre 1720 e 1820. Lo es situada a lado de la Casa Talavera, un construida de stilo baroca con orijina en o la sentenio 16 o la temprana de la sentenio 17, e aora usada como un sentro cultural.

On estima ce on ave dusento mil locas arceolojial en Mexico. Los inclui la ruinas e piramides maia en la sude de la pais, la construidas de fango a Paquimé en la stato norde Chihuahua, e la compleso enorme Teotihuacán a norde de la Site Mexico.