Un ponte franses colasa su la pesa de un camion

La colasa de un ponte cual ia mata du persones en la sude-ueste de Frans ia es cisa causada par un camion tro pesosa.

Du veculos ia cade en la Rio Tarn, a norde de Toulouse, cuando la ponte prosima a la vileta Mirepoix-sur-Tarn ia colasa a la matina de lundi.

Avocatos acusante dise ce un de la veculos, un camion, ia pesa plu ca 50 tones. La ponte suspendeda, construida en 1931, ia pote tolera 19 tones como pesa masima.

Un fia de 15 anios e la camionor ia mori en la asidente. La fia ia viaja en un auto con sua madre cuando la ponte ia deslia se de sua cables de suspende e ia cade a la rio.

La madre ferida ia es tirada de la acua par persones pasante. Sinco otra persones ia es grave ferida, incluinte du salvores e abitores local ci ia atenta salva la vitimes.

La camionor, de ci on ia trova sua corpo, ia transporta aparatos de fora a traversa de la ponte a sua compania, situada a alga sentos de metres a ultra.

A lundi, Eric Oget, maior de la vileta, ia sujesta ce avisas sur la restrinje de pesa, mostrada a ambos lados de la ponte, ia es cisa iniorada.

“De ves a ves, me ia vide veculos tre pesosa cual usa la ponte,” el ia comenta. “Nos ia es sempre vijilante en fa probas con la polisia munisipal, ma on ave veses cuando nos no vide los.”

La ponte ia es longa de 155 metres e larga de cuasi 7. Lo ia es renovida en 2003 par la consilio de Haute-Garonne. Cuando on ia esamina lo en la tarda de la anio pasada, lo ia mostra no problemes strutural.

La asidente ia tira atende a la securia de pontes, a un anio pos la mori de 43 persones cuando un ponte ia colasa en la site Genova en Italia.

Longo un reporta de la Salon Alta de la parlamento franses, sirca 25 mil pontes tra la pais nesesa reparas urjente.

Senator Hervé Maure, ci ia supravide acel sonda, ia dise a lundi: “La state de nosa pontes presenta un peril vera. Si un ponte colasa cual no es listada como perilosa, cual es la situa de la pontes clar identifiada como perilosa?”