Srilanca vota pos la bombis a la soldi de pascua

En Srilanca, la popla vota aora per eleje sua presidente nova, a sete menses pos un ataca teroriste cual ia mata plu ca 250 persones.

35 aspirores compete per votas en esta eleje, la numero tre pos 2009, cuando la gera interna de desenios ia fini en la pais.

Maithripala Sirisena, la presidente presente, ia deside no reaspira la posto. El ia es criticada pos la bombis par Daex a la soldi de pascua, cual ia ataca eglesas e oteles lusosa.

La governa ia es obligada a confesa ce lo ia sufri un fali major de securia, cuando la ministro de defende ia revela ce la autoriosas no ia distribui bon un averti sur atacas projetada, donada par la departe de securia en Barat a la comensa de acel mense.

Ante la comensa de vota, on ia reporta violentia en la norde-ueste de Srilanca, do fusilores ia ataca un convoia de buses portante votores muslim. La polisia dise ce no persones ia es ferida.

An si la paper de vota es longa de 60 sentimetres per conteni la nomes de tota la aspirores, esta eleje ave clar du favoredas. On ia acusa ce un de los ia fa maltratas de diretos umana en sua desenio como ministro de defende en la presidentia de sua frate.

Gotabhaya Rajapaksa ia es en potia cuando miles de persones, spesial tamiles, ia deveni mancante en lo cual on ia descrive como desapares forsada entre 2005 e 2015. Ma sua rol per fini la gera interna ia boni la fortuna de Rajapaksa pos la atacas a pascua.

Sua disposa sever a securia ia impresa multe persones en la majoria sinala budiste, e sua suportores iniora alegas contra el, incluinte demandas sur sua sitadania.

La importa de securia a votores no es iniorada par sua competor xef, Sajith Premadasa, ci ia inisia sua campania con la promete ce, si el gania, el va emplea la xef militar ci ia vinse la rebelores Tigres Tamil per supravide la securia nasional.

An tal, Premadasa foca plu comun a temas sosial, prometente elimina la povria e furni plu casas.

Como sua oposor, el ave ja un funda de suportores fidosa. El es la fio de la presidente asasinada par la Tigres Tamil en 1993. A presente, el es la ministro de casi, e ia susede oposa la familia Rajapaksa en la propre rejion de los.

Sirisena ia deveni la presidente en un vinse surprendente contra Rajapaksa en 2015. El ia deside no atenta denova, sin dona un esplica. Ma el deveni nonpopular con srilancas.

Indicas ce el ia iniora avertis sur la bombis a la soldi de pascua ia ariva pronto pos un crise constitual, provocada cuando el ia desemplea sua propre ministro xef.

Plu, el ia fa cexas bizara sur la cualia de nozas en la aviones de la airocompania nasional de Srilanca, e sur la organizores de un presenta par Enrique Iglesias, cantor espaniol, sujestante ce los debe es flajelida.