AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
6 novembre 2019
On ia deteni un fem ci ia atenta contrabanda oro en sua sapatos tra la frontera entre Rusia e Xina.
Usante un detetador de metales, duanores rusce ia descovre ce el ave oto discos de oro bandida a la fondos de sua pedes. En junta, la 1,9 cilogrames de oro ave un valua de plu ca sinco milion rublos.
La sitadan rusce ia pare “nervosa e suspetosa”, un portavose ia dise per la duana a un punto de frontera prosima a Txita en Sibir este. El ia “pone nonatural un pede ante la otra”, e esta ia crea suspeta en la duanores.
La fem ia porta la oro per un sitadan xines. Un investiga criminal es ja inisiada.
En esta anio, la autoriosas en la rejion Zabaicalsci-Crai ia catura persones diversa ci ia atenta contrabanda oro a Xina, incluinte un rusce ci ia atenta traversa la frontera con des baras de oro en sua sapatos de sporte.
La escava de oro es un comersia grande en Sibir, un pais rica con recursos. Ma en otobre, un parario ia colasa a un escaveria en la rejion Crasnoiarsc, matante a la min des-sinco persones.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).