AORA OJI

Novas de la mundo, simple reportada en elefen

On trova la caxas negra de un avion destruida barati

9 agosto 2020

Investigores ia trova la “caxas negra”, o rejistradores, de un avion cual ia mata a la min 18 persones cuando lo ia desintegra en la stato Kerala en Barat sude a venerdi.

La avion de Air India Express, viajante de Dubai, ia atenta atera a la airoporto de Kozhikode ma ia lisca sur la atereria en un mal clima e ia separa a du pesos.

190 persones ia es en la jeto Boeing 737, e un ofisior ia dise ce lo es “un miracle” ce lo no ia ensende. An tal, esta es la asidente la plu grave de un avion de pasajores en Barat en un desenio.

La viaja ia intende renativi baratis trapida par la crise de coronavirus, e donce on ia demanda ce la aidores ci ia responde prima a la asidente isoli se. La ministro xef Narendra Modi ia dise ce el es “doleda” par la asidente.

La vola IX 1134 ia porta 184 pasajores, incluinte 10 bebes, e ses ecipores cuando lo ia atenta atera a Kozhikode (ance conoseda con la nom Calicut).

La jeto ia rompe a 19:40 de ora local a venerdi. En sua atenta prima de atera, la pilotes no ia pote vide la atereria par causa de pluve forte.

Cuando los ia atenta denova, on dise ce la avion ia atera a mil metres ultra la limita de la atereria ante lisca a en un foso presipe.

La colpa ia divide la jeto a du pesos. Imajes mostra sua tronco trinxada e sua sejas blu sperdeda longo la tera. Ambos pilotes ia mori, e cuasi 150 persones es aora tratada en ospital.

La ministro de avioni ia visita la loca ier, do el ia anunsia la regania de la rejistradores de vola e de voses, cual va es cisa esensal per investiga la asidente. El ia loda la pilote xef e ia comenta ce lo es tro temprana per dise la causa esata.

Oaxaca proibi vende comedas nonurinte a enfantes

8 agosto 2020

En Mexico, la stato Oaxaca ia proibi vendes de comedas nonurinte e bevidas zucarosa a enfantes, en un atenta de redui la frecuentia de obesia e diabete.

Oaxaca es la stato prima cual ia fa esta proibi en un pais con un de la tasos la plu alta de mundo per obesia de enfantes. Persones ci desobedi la lege pote es multada e sua botecas pote es cluida. Reofendores risca es prisonida.

La cuantia de moris liada a la coronavirus en Mexico prosimi aora a 50 mil. Esta es la cuantia tre de la plu altas de mundo, pos la SUA e Brasil. Espertas dise ce si on es tro pesosa, on ave un risca aumentada de deveni grave malada o de mori par causa de la virus.

Sirca 73% de la popla mexican es tro pesosa, contrastada con sola un sinci en 1996, longo un studia par la Organiza per Coopera e Developa Economial. Mexicanes consuma plu bevidas gasosa per person ca cualce otra nasion.

Legores en la parlamento de Oaxaca ia aplaudi la aseta de la lege, ma botecores e vendores sur strada ia protesta. La lege pertine ance a vendadores en scolas.

La parlamentor ci ia proposa la lege, Magaly López Domínguez, ia dise ce la intende no es ce on dana botecores e otra vendores: estas pote continua vende bevidas zucarosa e comedas nonurinte, ma mera no a enfantes.

La visministro de sania, Hugo López-Gatell, ci es ance la ministro encargada a la crise de coronavirus, ia bonveni la cambia. En la mense pasada, el ia descrive bevidas zucarosa como “venena botelida” e ia recomenda ce persones no bevi los.

Christian Skoog, la representor de Unicef en Mexico, ia tuita ance sua aproba, disente ce tal leges proteje la diretos de enfantes a bon comedas nurinte.

En 2014, Mexico ia introdui un imposta a mal bevidas e comedas, sin proibi ce on vende los a enfantes.

Parasitos de malaria resiste un droga en Africa

7 agosto 2020

Siensistes ia deteta en Ruanda un varia de la parasito cual causa malaria – un varia resistente contra un cimical major per batalia la maladia. Los ia trova ce la parasitos pote resiste trata par artemisinina.

Esta es la ves prima cuando on ia oserva un tal resiste a esta medisin en Africa. La rexercores averti ce lo “ta pone un menasa major a la sania publica” en la continente.

Siensistes de la Instituida Pasteur, colaborante con la Program Nasional de Controla Malaria en Ruanda, la Organiza de Sania Mundal, la Ospital de Kochi e la Universia de Columbia en New York, ia analise samples de sangue de pasientes en Ruanda.

Los ia trova un muta de la parasito, capas de resiste artemisinina, en 19 de 257 pasientes a un de la sentros de sania cual los ia monitori.

En un article en la jornal Natur, la rexercores averti ce parasitos de malaria cual ia developa un resiste contra drogas presedente es “suspetada de contribui a miliones de plu moris par malaria en enfantes joven african en la desenio de 1980”.

Cuando la droga prima antimalarial, clorocina, ia es developada, rexercores ia crede ce la maladia va es eliminada pos alga anios. Ma pos la desenio de 1950, la parasitos ia evolui, deveninte capas de resiste drogas seguente.

Comun aora, on trata infetas de malaria con un combina de du medisines: artemisinina e piperacina. Ma la parasitos ia comensa developa un resiste de artemisinina. On ia rejistra prima esta en 2008 en Asia sude-este.

A acel tempo, siensistes ia teme ce la resiste contra artemisinina va aveni ance en Africa, con efetos desastrosa. La rexerca nova sujesta ce esta temes es realida.

En 2018, paises african ia representa plu ca 90% de la plu ca 400 000 moris rejistrada como causada par malaria.

A 75 anios pos la bombi nucleal de Hiroshima

6 agosto 2020

En Japan, campanas ia sona en Hiroshima per onora la aniversario 75 de la cade de la bomba atomal prima de mundo. Ma la rituos de recorda ia es reduida en esta anio par causa de la pandemica.

A 6 agosto 1945, un bombador esuan ia cade un bomba de uranio supra la site, matante sirca 140 mil persones. A tre dias plu tarda, un arma nucleal du ia cade sur Nagasaki. Pos du semanas, Japan ia sede, fininte la Gera Mundal Du.

En la parte temprana de oji, Shinzō Abe, ministro xef de Japan, e la maior de Hiroshima ia acompania survivores de la bomba e sua desendentes en la Parce de Pas de la site.

La parce es usual folida con miles de persones per la aniversario, ma la cuantia de persones ia es notable plu peti en esta anio. Sejas ia es spasida e la plu de la persones presente ia porta un masca de fas.

Un tempo de silentia ia aveni a 08:15, la ora esata cuando la bomba ia cade sur la site.

La maior, Kazumu Matsui ia dise: “A 6 agosto 1945, un sola bomba atomal ia destrui nosa site. La rumor alora ia dise ce ‘no cosa va crese asi per 75 anios’. E an tal, Hiroshima ia recovre, deveninte un simbol de pas.”

En un mesaje video, la secretor jeneral de la NU, António Guterres, ia urje ce tota nasiones renovi sua labora per aboli tal armas.

“Divide, desfida e un manca de dialogo menasa repone la mundo a un situa nonrestrinjeda de compete nucleal stratejial,” el ia dise. “La sola modo de elimina completa la risca nucleal es elimina completa la armas nucleal.”

Un esplode enorme a la porto de Beirut

5 agosto 2020

Lubnan lamenta pos un esplode jigante ier en la capital, Beirut, cual ia mata a la min 100 persones e ia feri plu ca 4000 otras.

La site intera ia es secuteda par la pum, cual ia comensa con un focon a la porto e ia esplode per crea un nube xampinionin.

Presidente Michel Aoun ia dise ce 2750 tones de nitrato de amonio ia es nonsecur conservada en un beneria tra ses anios. El ia ajendi un consenta urjente de sua consilio per oji e ia dise ce on debe declara un state de crise per du semanas.

La pais va oserva un periodo ofisial de lamenta per tre dias de oji.

Aoun ia anunsia ance ce la governa va relasa 100 mil milion liras (66 milion dolares esuan) de reservas de crise.

“Lo cual nos vide es un desastre enorme,” la Crus Roja lubnani ia comenta. “On ave vitimes e mores a tota locas. Plu ca sento ia perde sua vives. Nosa ecipos fa ancora operas de xerca e salva en la locas ensircante.”

Ofisiores ia dise ce on ia inisia un investiga per trova la causa esata de la esplode. La Consilio Suprema de Defende de la pais ia dise ce la persones culpable va fasa “la puni masima” posible.

On reporta ce la nitrato de amonio ia es descargada de un barcon confiscada a la porto en 2013, e ia es tenida en un beneria ala.

La esplode ia aveni a un tempo delicata per Lubnan, con un crise economial cual reensende divides vea an cuando la pais batalia la problem de la coronavirus.

La tensa es ance alta ante la revela a venerdi de la judi en un litiga sur la mata de Rafik Hariri, ministro xef pasada, en 2005.

Un SOS sur un plaia salva marores encaliada

4 agosto 2020

Tre marores micronesian encaliada sur un isola pico e distante en la ueste de la Mar Pasifica ia es salvada cuando sua mesaje SOS ia es persepida sur un plaia.

La omes ia es trovada sur Isola Pikelot en Micronesia par aviones militar de Australia e la SUA a soldi, la Forte de Defende Australian ia dise.

Los ia manca tra tre dias pos cuando sua scife de sete metres ia consuma sua carburante e ia vaga multe de sua curso intendeda. Tota la omes ia es trovada en un bon state sin feris major.

La autoriosas en Guam, un teritorio esuan prosima, ia inisia la xerca a saturdi, cuando la omes ia fali completi un viaja de 42 cilometres entre la atoles Pulawat e Pulap. En loca, sua barco ia fini a Isola Pikelot, a cuasi 200 cilometres a ueste de sua punto de parti.

Pos cuando on ia vide de la aira la leteras SOS scriveda sur la arena, un elicotor australian ia atera sur la isola peti e ia dona comedas e acua a la omes.

La elicotor ia veni de la barcon Canberra, cual ia es en via a Hawaii per eserses marinal cuando lo ia es clamada per aida la xerca.

Ofisiores australian ia dise ce la marores va es revenida a casa par un barcon patruliante micronesian.

Micronesia, en la Pasifica ueste, es composada de sirca 600 isolas pico, sperdeda tra un estende vasta de mar.

La pianiste Leon Fleisher mori con 92 anios

3 agosto 2020

Leon Fleisher, un pianiste famosa de la SUA, ia mori de canser con 92 anios.

Fleisher ia comensa como un enfante talentosa en la desenio de 1940, ma sua carera ia es disturbada par un feri a sua mano destra. Plu tarda, el ia foca sua labora a dirije orcestras, ensenia, e mestri la repertorio de mano sinistra per piano.

Pos tre desenios e un serie de terapias, el ia regania la usa de sua mano destra e ia flori denova.

Fleisher ia nase en San Francisco en 1928, a jenitores ci ia migra a la SUA de Europa este. El ia comensa aprende la piano cuando el ia ave cuatro anios, e en sua anio des el ia es invitada per studia su la pianiste clasical major Artur Schnabel.

Con eda de 16 anios, el ia debua con la Orcestra Filarmonial de New York e ia progresa a fama internasional e un carera produosa de rejistras.

Ma en 1964, el ia developa un disturba neurolojial, distonia focal, cual ia descapasi el de jua con sua mano destra. Pos un pausa de du anios, el ia ensenia a la Instituida Peabody en Baltimore en la norde-este de la SUA. El ia dirije ance orcestras e ia jua obras scriveda per sola la mano sinistra.

“Me ia veni subita a la comprende ce mea asosia con musica es plu grande ca como mera un pianiste de du manos,” el ia dise en un intervisa en 2000.

El ia revade a jua par du manos en 1995 e ia rejistra du albumes alta lodada. Un de los, nomida Du manos, es ance la titulo de un filma documentinte, nominada per un premio Oscar, sur sua vive.

Un avion cade plen de cocaina en Papua Gine Nova

2 agosto 2020

La polisia dise ce un avion peti cual ia cade corta pos enaira en Papua Gine Nova ia es supracargada con cocaina intendeda per la mercato australian. La avaria de la gang de drogas ia contribui a sua defeta.

On crede ce la Cessna ia porta plu ca 500 cilogrames de cocaina, con valua de 80 milion dolares australian cuando lo ia cade a lundi.

Sinco omes es arestada, sur ci on alega ce cada ia parteni a un sindicato de crimin en Melbourne. En un declara formal, la polisia australian ia dise ce lo ia vijila la gang tra du anios.

La veculo lejera ia enaira de Mareeba en Queensland Norde a soldi, e ia vola a altia basa per evita es detetada par radar, ante atera a un campo de avion a Papa Lea Lea, a norde de Port Moresby. La polisia dise ce ala on ia carga lo con drogas per la vola de revade a Australia.

“La AFP [Polisia Federal Australian] alega ce avaria ia ave un rol major en la atas de la sindicato, e no pote esclui ce la pesa de la cocaina ia ave un efeto a la capasia de enaira de la avion,” la declara ia nota.

On ia trova la ruina de la avion, abandonada e vacua, a distantia corta de la campo. La drogas, en 28 sacos, con ance un cuantia nonspesifada de mone australian, ia es reprendeda par polisiores de Australia e Papua Gine Nova, plu tarda.

La pilote, un australian, ia presenta se a la Consuleria Australian en Papua Gine Nova a martedi. El ia es arestada e on ia acusa el sur un crimin contra leges de migra.

La polisia ia ajunta ce la sinco omes ave lias a crimin organizada italian e ce los ia es arestada en Queensland e Victoria a tempo corta pos la enaira de la avion per Papua Gine Nova. Si on condena los, los va es cisa prisonida per sua vive.

La Viscomisionor de la AFP ia comenta: “Esta arestas demostra ce, an con cualce sofistica o oportunisme de la atentas par criminores organizada o de la metodos cual los usa, la enforsa de lege egali los e causa la dana masima a esta emprendes criminal.”

Des baratis mori pos bevi ijeninte en loca de alcol

1 agosto 2020

En un vileta en la stato Andhra Pradesh en Barat sude, a la min des persones ia mori pos bevi ijeninte alcolosa pos la clui de botecas de alcol. La vileta Kurichedu es encluida pos un aumenta local de casos de coronavirus.

La xef de polisia de la distrito, Siddharth Kaushal, ia dise ce la persones ci ia mori ia misca la ijeninte de mano con acua e bevidas gasosa. Los ia ave ja un depende de alcol e ia comensa bevi la misca a aprosima des dias ante sua mori.

“Nos investiga esce la ijeninte ia conteni cualce otra sustantia nosiva,” Kaushal ia comenta, ajuntante ce la polisia ia envia samples de la ijeninte per analise cimical. “Alga persones ci es forte abituada a alcol ia consuma ijenintes per felisi se. Alcol no es disponable par causa de la enclui, ma ijenintes de mano es fasil disponable.”

La governa federal de Barat ia reabri la plu comersias per preveni un colasa sever de la economia.

Plu temprana en esta semana, on ia anunsia ce on va permete la reabri de instituidas de ioga e jinasios, e ce restrinjes va es canselada per moves de benes e persones. Ma ancora multe statos enforsa encluis en rejiones definida en cuando grupos de casos de la virus emerji.

La cuantia de casos confirmada de la maladia en Andhra Pradesh ia crese novuple en la mense pasada.

Entretempo, Barat ia rejistra nasional plu ca 55 mil infetas ier, e la cuantia de moris ia crese par 779 a un soma de plu ca 35 700.

Un contrae recordo en la economia deutx

31 julio 2020

La economia de Deutxland ia contrae con rapidia recordo entre la efetos de la pandemica de coronavirus.

La statistica ofisial nova indica ce la produi intera de benes e servis ia descrese par 10,1% en la periodo de april a junio. Esta ia es la descrese la plu agu rejistrada en un cuatri de anio, pos la comensa de publici tal informas en Deutxland en 1970.

La redui ia segue un otra descrese, min agu ma ancora grave, par 2% en la tre menses presedente.

La economia deutx, como multe otras, ia es forte colpada par la pandemica e la restrinjes poneda per atenta conteni lo.

La ofisia de statistica de la pais ia dise ce on ia ave “un colasa enorme” en la spende par familias, en la investi a aparatos e macinas, e en esportas e emportas.

Deutxland es un esportor major, spesial per benes fabricada, donce, nonevitable, lo ia es multe afetada par la disturba causada a la comersia internasional par la crise de sania.

La sola parte de la economia cual ia crese alga, longo la ofisia de statistica, es la spende noninvestal par la campo publica.

On ia vide sinias en otra datos ce cisa un recovre ia comensa pos april. Esta es sujestada par la statistica mensal sur la produi industrial e la vende a consumores, per esemplo.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 9 agosto 2020 (06:59 UTC).