Alisia en la pais de mervelias

Capitol 12

Alisia atesta

“Asi!” Alisia cria, tota oblidante en la stimula de la momento ce el ia deveni tan grande en la minutos resente, e el salta tan fretosa sur sua pedes ce el cade la banca de la juria par colpa lo con la borda de sua falda, versante tota la juriores sur la testas de la fola a su, do los contorse sua brasos e gamas, e pare a el multe simil a un globo de pexes oro cual el ia cade sin intende en la semana pasada.

“O! pardona me!” el esclama en un tono de angusa grande, e comensa recolie los tan rapida como posible, car el continua revide en sua mente la asidente de la pexes oro, e el ave un crede neblosa ce on debe colie los sin pausa e repone los en la banca de la juria, per evita ce los mori.

“La prosede no pote continua,” la Re dise, en un vose multe seria, “asta cuando tota la juriores senta denova en sua locas coreta – tota,” el repete con asentua grande, fisante sua regarda a Alisia cuando el parla.

Alisia regarda la banca de la juria, e vide ce, en sua freta, el ia pone la Lezardo a un posa inversada, e la povre peti brandi aora sua coda en un modo triste, car lo es tota noncapas de move. Alisia estrae pronto lo denova, e coreti la posa. “Ma esta importa apena,” el dise a se; “me suposa ce sua valua a la prosede ta es egal en ambos posas.”

Direta pos cuando la juria ia calmi a alga grado pos la xoca de es versada, e on ia trova sua tabletas e penetas e ia redona estas a los, los comensa multe asidua la taxe de scrive un istoria de la asidente – tota de los estra la Lezardo, ci pare tan emosiada ce el pote fa no plu ca senta con sua boca abrida, contemplante la teto de la corte.

“Cual tu sabe sur esta caso?” la Re dise a Alisia.

“No cosa,” Alisia dise.

Tota no cosa?” la Re ostina.

“Tota no cosa,” Alisia dise.

“Acel es multe importante,” la Re dise, turnante a la juria. Los comensa apena scrive esta sur sua tabletas cuando la Coneo Blanca interompe: “Tu vole dise nonimportante, natural, Altia,” el dise en un tono multe respetosa, ma grimante e fronsinte sua suprasiles a el en cuando el parla.

Nonimportante, natural, me ia vole dise,” la Re ajunta fretosa, e continua a se, en un vose basa, “importante – nonimportante – nonimportante – importante –” como si el esperimenta per trova cual parola sona plu bon.

Alga membros de la juria scrive la parola “importante”, e alga “nonimportante”. Alisia vide esta, car el es tan prosima ce el pote regarda sua tabletas; “ma acel es ance nonimportante,” el pensa a se.

A esta momento, la Re, ci ia es ocupada tra alga tempo en scrive en sua libro de notas, cria “Silenti!”, e leje de sua libro: “Regula Cuatrodes-du. Tota persones ci ave plu ca un cilometre de altia debe sorti de la corte.

Cadun regarda Alisia.

Me no ave un cilometre de altia,” Alisia dise.

“Ma si,” la Re dise.

“Cuasi du cilometres,” la Rea ajunta.

“Ma me no va sorti, an tal,” Alisia dise: “plu, acel no es un regula normal: tu ia inventa lo a la momento pasada.”

“Lo es la regula la plu vea en la libro,” la Re dise.

“Donce lo debe ave la numero Un,” Alisia dise.

La Re deveni pal, e clui fretosa sua libro de notas. “Considera e deside,” el dise a la juria, en un vose basa e tremante.

“On debe presenta ancora plu atestas, per favore, Altia,” la Coneo Blanca dise, saltante sur sua pedes en un freta grande: “Nos veni de reseta esta paper.”

“Cual el conteni?” la Rea dise.

“Me no ia comensa abri lo,” la Coneo Blanca dise; “ma lo pare es un letera, scriveda par la prisonida a – a algun.”

“Lo debe es tal,” la Re dise, “estra si on ia scrive lo a nun, e acel no ta es normal, tu sabe.”

“A ci on ia adirije lo?” un de la juriores dise.

“On tota no ia adirije lo,” la Coneo Blanca dise: “en fato, no cosa es scriveda sur la esterna.” El desplia la paper en cuando el parla, e ajunta: “Lo no es un letera, an pos tota. Lo es un colie de strofes.”

“Esce los es en la scrive de mano de la prisonida?” un otra de la juriores demanda.

“No, tota no,” la Coneo Blanca dise, “e esta es la cosa la plu strana.” (Tota la juriores aspeta confondeda.)

“Clar, la prisonida ia imita la mano de un otra,” la Re dise. (Tota la juriores aspeta denova felis.)

“Per favore, Altia,” la Cavalor dise, “me no ia scrive lo, e on no pote demostra ce me ia scrive lo. No nom es suscriveda a la fini.”

“Si tu no ia suscrive lo,” la Re dise, “tu es en un situa ancora plu mal. Lo es clar ce tu ia intende alga malcondui, car tu no ia suscrive tua nom como un person onesta.”

Tota aplaudi pos esta: lo ia es la cosa prima de un spesie vera intelijente cual la Re ia dise oji.

“Acel demostra ce el es culpable, natural,” la Rea dise: “donce, destesti –”

“Lo no demostra an un cosa simil!” Alisia dise. “Vera, vos no conose an la tema de la strofes!”

“Leje los,” la Re dise.

La Coneo Blanca apone sua oculo. “Do me debe comensa, per favore, Altia?” el demanda.

“Comensa a la comensa,” la Re dise, multe seria, “e continua asta la ateni de la fini. Alora, sesa.”

On ave un silentia completa en la corte tra cuando la Coneo Blanca proclama esta strofes:

On dis’ ce tu ia vide los,
    E nota me a el:
Los dis’ ce me no pote nad’
    Ma loda me con zel’.
El dis’ ce me ia vade no
    (Nos sabe la real):
E si el ta insiste plu,
    Tu ta deveni cual?
Me dona un, los dona du,
    Tu dona tre a nos,
Ma los reveni ja a tu,
    Car me ia perde los.
Si me o el ta es miscad’
    En esta caso, ta
Ce on fa ce tu libri los,
    Esata como ja.
Me ia suposa ce tu es
    Un ostacul’, ma no:
El es coler; tu veni entre
    Nos e los e lo.
Revela no ce el prefere
    Los; acel, me pre’,
Ta resta sempre un secret’
    De sola tu e me.

“Acel es la atesta la plu importante cual nos ia oia ja,” la Re dise, frotante sua manos; “donce aora, ta ce la juria –”

“Si cualcun de los pote esplica lo,” Alisia dise (el ia deveni tan grande en la minutos pasada ce el ave an no un teme pico de interompe el), “me va dona un moneta a el. Me no crede ce lo conteni an un atom de sinifia.”

Tota la juriores scrive, sur sua tabletas, “El no crede ce lo conteni an un atom de sinifia”, ma nun de los atenta esplica la paper.

“Si lo conteni no sinifia,” la Re dise, “nos evita un monton de labora, tu sabe, car nos no nesesa esplora lo. An tal, me no es serta,” el continua, estendente la strofes sur sua jeno e regardante los con un oio; “me pare vide alga sinifia en los, an tal. – ‘dis’ ce me no pote nad’’ – tu no es capas de nada, no?” – el ajunta, turnante a la Cavalor.

La Cavalor acorda triste con sua testa. “Esce me aspeta capas de nada?” el dise. (Serta, lo no pare tal, car el es intera composada de carton.)

“Bon asta aora,” la Re dise; e el continua murmura a se sur la strofes: “‘Nos sabe la real’ – esta refere a la juria, natural – ‘E si el ta insiste plu’ – esta debe es la Rea – ‘Tu ta deveni cual?’ – Un bon demanda! – ‘Me dona un, los dona du’ – vide, lo es clar ce esta descrive lo cual el ia fa con la tartetas, tu sabe –”

“Ma lo continua con ‘los reveni ja a tu’,” Alisia dise.

“E vide: los es asi!” la Re dise en vinse, indicante la tartetas sur la table. “No cosa pote es plu clar ca esta. E plu – ‘El es coler’ – mea cara, tu senti nunca coler, me crede?” el dise a la Rea.

“Nunca!” la Rea dise, furiosa, lansante un portainca a la Lezardo en cuando el parla. (La peti Ben nonfortunosa ia sesa scrive sur sua tableta con un dito, car el ia trova ce lo lasa no marca; ma el recomensa fretosa aora, usante la inca cual flueta sur sua fas tra cuando lo dura.)

“An si tu senti nunca coler, cisa tu sinci aora coler,” la Re dise, regardante a la corte con un surie. Cadun es tota silente.

“Me ia fa un broma de parolas!” la Re ajunta en un tono iritada, e cadun rie. “Ta ce la juria considera e deside,” la Re dise, a cuasi la ves dudes de la dia.

“No, no!” la Rea dise. “On condena prima – on deside a pos.”

“Ba, asurda!” Alisia dise forte. “Tan riable ce la condena ta es prima!”

“Silenti!” la Rea dise, purpurinte.

“Tota no!” Alisia dise.

“Destesti el!” la Rea cria tan forte como posible. Nun move.

Vos no importa!” Alisia dise (el ia ateni ja sua grandia normal). “Vos es no plu ca un colie de cartas!”

A esta, tota la cartas vola tra la aira e desende cadente sur el; el fa un xilia peti, partal de teme e partal de coleria, e atenta bate los a via, e trova ce el reclina sur la colineta, con sua testa sur la jenos de sua sore, ci brosi dulse a via alga folias mor cual ia cade de la arbores, voletante sur sua fas.

“Velia, Alisia, mea cara!” sua sore dise. “Vera, tu ia dormi tan longa!”

“O! me ia fa un sonia tan strana!” Alisia dise. E el raconta a sua sore, tan bon como el pote recorda los, tota esta aventuras strana sur cual tu veni de leje; e cuando el fini, sua sore besa el e dise: “Lo ia es serta un sonia strana, mea cara, vera; ma core aora a la casa per come: la ora deveni tarda.” Donce Alisia leva se e core a via, e en cuando el core, el pensa, con bon razona, ce el ia fa un sonia tan plen de mervelias.

Ma sua sore senta ancora tal como Alisia ia lasa el, apoiante sua testa sur la mano, regardante la reposa de la sol, e pensante a la peti Alisia e tota sua aventuras merveliosa, asta cuando ance el comensa sonia en alga manera, e sua sonia es esta:

Prima, el imajina la peti Alisia mesma: denova, la manos pico es abrasada sur sua vasto, e la oios briliante regarda zelosa la suas – el pote oia la tonos mesma de sua vose, e vide acel peti secute strana de sua testa per controla la capeles vagante cual vole sempre cade ante sua oios – e en cuando el escuta, o pare escuta, tota la loca ambiente deveni poplida par la animales strana de la sonia de sua sore peti.

La erba longa xuxa a sua pedes en cuando la Coneo Blanca pasa fretante – la Mus asustada plufi tra la stange prosima – el oia la clicas de la copas de te en cuando la Lepre de Marto e sua amis comparti sua bevi sin fini, e la vose xiliante de la Rea cual comanda la esecuta de sua invitadas nonfortunosa – a un ves nova, la bebe porcin stornui sur la jeno de la Duxesa, en cuando platos e boles rompe sirca el – a un ves nova, la aira es plenida par la cria de la Grifon, la grinse de la peneta de la Lezardo, e la jemis de la cavias supresada, miscada con la sanglotas distante de la Tortuga Falsa misera.

Donce el senta plu, con oios cluida, e crede cuasi ce el mesma es en la Pais de Mervelias, an si el sabe ce si el fa no plu ca reabri sua oios, tota va cambia a la realia comun – la erba va es mera xuxante en la venta, e la stange va es ondetante su la moves de la juncos – la copas clicante va cambia a la campanas tintinante de la oveas, e la crias xiliante de la Rea va deveni la vose de la pastor enfante – e la stornui de la bebe, la cria de la Grifon, e tota la otra sonas strana va cambia (el sabe) a la ruidos confusada de la patio de la cultiveria – e la mui de la boves distante va sustitui se per la sanglotas lamentosa de la Tortuga Falsa.

Final, el imaji en sua mente ce sua sore peti va deveni mesma un fem adulte en la tempo seguente; ce el va reteni, tra tota sua anios plu matur, la cor simple e amante de sua enfantia; ce el va colie sirca se la peti enfantes nova, ci mesma va escuta con oios briliante e zelosa la multe naras strana, cisa an la sonia de la Pais de Mervelias de la tempo tan distante; e ce el va compatia los en tota sua tristias noncomplicada, e trova un plaser en tota sua joias pur, recordante sua propre enfantia e la dias felis de estate.

© 2016 Elefen.org. Tota diretos de autor es reservada.