Alisia en la pais de mervelias

Capitol 11

Ci ia fura la tartetas?

La Re e Rea de Cores senta ja sur sua trono cuando los ariva, e un fola grande ia asembla sirca los – tota spesies de avias e animales peti, e ance la colie completa de cartas: la Cavalor sta ante los, en cadenas, con un soldato a cada lado per garda el; e prosima a la Re on ave la Coneo Blanca, con un trompeta en un mano e un rola de pergamin en la otra. En la media de la corte, on ave un table con un plato grande de tartetas sur lo: los aspeta tan bon ce Alisia deveni multe fame en regarda los – “Me desira ce on va fini la prosede,” el pensa, “e distribui ja la cometas!” Ma lo pare tota nonprobable ce esta va aveni, donce el comensa regarda tota la cosas sirca se, per pasa la tempo.

Alisia ia es nunca en un corte de justia a ante, ma el ia leje descrives de los en libros, e el es multe contente de trova ce el conose ja la nom de cuasi tota cual es ala. “Acel es la judor,” el dise a se, “par causa de sua peruca grande.”

La judor, en pasa, es la Re. E, car el porta sua corona supra la peruca (regarda la frontispis si tu vole vide como el fa lo), el aspeta tota no comfortosa, e la efeto es serta no bela.

“E acel es la banca de la juria,” Alisia pensa. “E acel des-du creadas,” (el es obligada a dise “creadas”, tu vide, car alga de los es animales, e alga es avias) “me suposa ce los es la juriores.” El repete esta parola a se a du o tre veses, sentinte alga orgulosa de lo: car el pensa, en un razona coreta, ce vera poca xicas de sua eda conose an pico sua sinifia. An tal, “membros de la juria” ta sufisi egal bon.

Tota la des-du juriores es multe ocupada en scrive sur tabletas. “Cual los fa?” Alisia xuxa a la Grifon. “Los no pote ja ave cosas per scrive, ante la comensa de la prosede.”

“Los scrive sua nomes,” la Grifon xuxa en responde, “car los teme oblida los ante la fini de la prosede.”

“Stupidas!” Alisia comensa en un vose forte e stonada; ma el para fretosa, car la Coneo Blanca esclama “Silentia en la corte!”, e la Re apone sua oculo e regarda ansiosa sirca se per descovre ci parla.

Alisia pote vide, tan bon como si el ta regarda supra la spalas de los, ce tota la juriores scrive aora “Stupidas!” sur sua tabletas, e el persepi an ce un de los no sabe spele la parola, e nesesa demanda a sua visina. “Sua tabletas va es en un confusa grande ante la fini de la prosede!” Alisia pensa.

Un de la juriores ave un peneta cual grinse. Natural, Alisia no pote tolera esta, e el vade sirca la corte a un loca pos el, e trova multe pronto un bon momento per prende lo a via. El fa esta en modo tan rapida ce la povre jurior peti (el es Ben, la Lezardo) tota no pote comprende cual cosa ia aveni a el. Donce, pos xerca lo asi e ala, el es obligada a scrive con un dito tra la resta de la dia; e vera esta susede apena, car lo lasa no marca sur la tableta.

“Eraldo, leje la acusa!” la Re dise.

A esta, la Coneo Blanca fa tre tonos forte par la trompeta, e desrola alora la pergamin, e leje la seguente:

La Rea de Cores ia forni tartetas,
    A fini de la primavera:
La Cavalor d’ Cores ia furni furetas
    E saisi la plato intera!

“Considera e deside,” la Re dise a la juria.

“Ancora no, ancora no!” la Coneo interompe fretosa. “Nos debe fa multe otra cosas ante acel!”

“Clama la atestor prima,” la Re dise. E la Coneo Blanca fa tre tonos forte par la trompeta e cria: “Atestor prima!”

La atestor prima es la Xapor. El entra con un tas de te en un mano e un peso de pan burida en la otra. “Pardona, Altia,” el comensa, “ce me porta estas a la corte; ma me no ia fini completa mea come cuando on ia clama me.”

“Tu ia debe fini,” la Re dise. “Cuando tu ia comensa?”

La Xapor regarda la Lepre de Marto, ci ia segue el a la corte, con braso en braso con la Liron. “A la des-cuatro de marto, me crede,” el dise.

“Des-sinco,” la Lepre de Marto dise.

“Des-ses,” la Liron ajunta.

“Scrive lo,” la Re dise a la juria. E tota la juria scrive zelosa tota la tre datas sur sua tabletas, e soma los, e converti alora la soma a un espresa de mone.

“Desapone tua xapo,” la Re dise a la Xapor.

“El no parteni a me,” la Xapor dise.

Furada!” la Re esclama, turnante a la juria, ci scrive direta un nota de la fato.

“Me reteni los per vende,” la Xapor ajunta per esplica; “me no posese un propre. Me es un xapor.”

Asi, la Rea apone sua oculo e comensa fisa sua regarda a la Xapor, ci deveni pal e tremante.

“Presenta tua atestas,” la Re dise; “e no en un modo ansiosa, o me va comanda ce on esecuta tu do tu sta.”

Esta pare tota no coraji la atestor: el pasa constante de un pede a la otra, regardante ansiosa la Rea, e en sua confusa el morde sua tas de te en loca de la pan burida, estraente un peso grande de lo.

A esta momento mesma, Alisia esperia un senti multe noncomun, cual confonde multe el, asta cuando el persepi cual cosa aveni: el comensa deveni denova plu grande, e el pensa prima ce el va sta e sorti de la corte; ma, pos pensa plu, el deside resta do el es, a la min tra cuando la spasio sufisi per el.

“Me desira ce tu no ta presa tan multe,” la Liron dise, sentante a sua lado. “Me pote apena respira.”

“Me no pote evita lo,” Alisia dise multe umil: “me crese.”

“On no permete ce on crese asi,” la Liron dise.

“No parla asurda,” Alisia dise plu corajida: “tu sabe ce tu crese ance.”

“Si, ma me crese a un rapidia asetable,” la Liron dise, “no en acel manera riable.” E, multe malumorosa, lo sta e traversa a la otra lado de la corte.

Tra tota esta tempo, la Rea ia sesa nunca fisa sua regarda a la Xapor, e, cuando la Liron traversa la corte, el dise a un de la ofisiores de la corte: “Trae a me la lista de la cantores en la conserta la plu resente!”; e a esta, la Xapor misera trema tan multe ce el secute a via ambos sua sapatos.

“Presenta tua atestas,” la Re repete coler, “o me va comanda ce on esecuta tu, an si tu es ansiosa o no.”

“Me es un om povre, Altia,” la Xapor comensa, en un vose tremante, “e me ia comensa apena mea te – tra ja no plu ca un semana o du – e car la pan burida ia magri tan – e la te ia tictaca –”

“La te ia fa cual?” la Re dise.

“Lo ia comensa con la te,” la Xapor responde.

“Natural, ‘tictaca’ comensa con un T!” la Re dise sever. “Tu opina ce me es stupida? Continua!”

“Me es un om povre,” la Xapor continua, “e tota ia tictaca a pos – ma la Lepre de Marto ia dise –”

“Ma no!” la Lepre interompe en un freta grande.

“Ma si!” la Xapor dise.

“Me nega lo!” la Lepre de Marto dise.

“El nega lo,” la Re dise: “omete esta parte.”

“Bon, an tal, la Liron ia dise –” la Xapor continua, turnante ansiosa sua regarda per vide esce ance la Liron va nega lo; ma la Liron nega no cosa, car lo dormi profonda.

“A pos,” la Xapor continua, “me ia talia e buri alga plu pan –”

“Ma cual la Liron ia dise?” algun en la juria demanda.

“Me no pote recorda acel,” la Xapor dise.

“Tu es obligada a recorda,” la Re comenta, “o me va comanda ce on esecuta tu.”

La Xapor misera cade sua tas de te e pan burida, e ajena se. “Me es un om povre, Altia,” el comensa.

“Tu es un parlor multe povre,” la Re dise.

Asi, un de la cavias aclama, e es supresada sin pausa par la ofisiores de la corte. (Car acel es un parola alga difisil, me va esplica rapida a tu lo cual los fa. Los ave un saco grande de lona, cluable par cordetas a la boca: los lisca la cavia en esta, con testa a su, e senta alora sur lo.)

“Me es felis ce me ia vide acel,” Alisia pensa. “Me ia leje tan comun en la jornales, a la fini de prosedes, ‘On ia atenta alga aplaudi, cual ia es supresada sin pausa par la ofisiores de la corte’, e me ia comprende nunca la sinifia ante aora.”

“Si tu sabe no plu sur la caso, ta ce tu retira tu,” la Re continua.

“Me no pote plu retira me,” la Xapor dise: “me ajena ja.”

“Donce tu pote senta tu,” la Re responde.

Asi la otra cavia aclama, e es supresada.

“Bon, on ia desprende la cavias!” Alisia pensa. “Aora nos va progresa plu bon.”

“Me ta prefere fini mea te,” la Xapor dise, con un regarda ansiosa a la Rea, ci leje la lista de cantores.

“Ta ce tu parti,” la Re dise, e la Xapor sorti fretosa de la corte, an sin pausa per pone sua sapatos.

“– e ta ce on destesti el a estra,” la Rea ajunta a un de la ofisiores; ma la Xapor es ja ultra vista ante cuando la ofisior pote ateni la porte.

“Clama la atestor seguente!” la Re dise.

La atestor seguente es la cosinor de la Duxesa. El porta la vaso de peper en sua mano, e Alisia divina ci el es, an ante cuando el entra a la corte, car tota la persones prosima a la porte comensa stornui a la mesma tempo.

“Presenta tua atestas,” la Re dise.

“No,” la cosinor dise.

La Re regarda ansiosa la Coneo Blanca, ci dise, en un vose basa: “Altia, tu debe interoga esta atestor.”

“Alora, si me debe, me debe,” la Re dise en un manera triste, e, pos crusa sua brasos e fronsi sua suprasiles a la cosinor asta cuasi la desapare de sua oios, el dise, en un vose profonda: “De cual tartetas es composada?”

“Peper, normal,” la cosinor dise.

“Melasa,” un vose dormosa dise de pos el.

“Saisi acel Liron!” la Rea esclama xiliante. “Destesti acel Liron! Estrae acel Liron de la corte! Supresa lo! Pinsi lo! Desvibrisi lo!”

Tra alga minutos, la corte intera es en un caos per estrae la Liron de la sala, e, cuando final los calmi denova, la cosinor ia desapare ja.

“No importa!” la Re dise, en un manera multe lejerida. “Clama la atestor seguente.” E el ajunta a la Rea, en un vose minor: “Vera, mea cara, tu debe interoga la atestor seguente. La taxe dole multe mea fronte!”

Alisia oserva la Coneo Blanca ci torpi con la lista, sentinte multe curiosa per vide la spesie de la atestor seguente, “– car los ancora no ia oia un atesta informosa,” el dise a se. Imajina sua surprende cuando la Coneo Blanca proclama, tan forte como posible en sua peti vose alta, la nom “Alisia”!

© 2016 Elefen.org. Tota diretos de autor es reservada.