Alisia en la pais de mervelias

Capitol 8

La campo de croceta de la Rea

Un arboreta grande de rosas sta prosima a la entra de la jardin: la rosas cual crese sur lo es blanca, ma tre jardinores labora a los, ocupada per pinti los a roja. Alisia pensa ce esta es un cosa multe strana, e el prosimi per oserva los, e, direta cuando el ariva a los, el oia un de los disente: “Atende, Sinco! No salpica la pinta sur me en acel modo!”

“Me no ia pote evita,” Sinco dise, en un tono malumorosa. “Sete ia puieta mea codo.”

A esta, Sete leva sua regarda e dise: “Serta, Sinco! Tu culpa sempre la otras!”

“Ta ce tu no disputa!” Sinco dise. “Me ia oia la Rea dise, an tan resente como oji, ce tu merita es destestida!”

“Perce?” la parlor prima dise.

“Acel no conserna tu, Du!” Sete dise.

“Ma si, vera, lo conserna el!” Sinco dise. “E me va responde – lo ia es car el ia porta radises de tulpa a la cosinor en loca de oniones.”

Sete lansa sua brosa a tera, e veni de comensa dise “Ma esta es multe nonjusta –” cuando sua regarda veni acaso a Alisia ci sta e oserva los, e Sete para subita: la otras turna ance sua regardas, e tota de los basi se en inclina.

“Esce vos ta informa me, per favore,” Alisia dise, alga timida, “perce vos pinti esta rosas?”

Sinco e Sete dise no cosa, ma los regarda Du. Du comensa en un vose basa: “Bon, en fato, tu vide, Seniora, esta ia debe es un arboreta de rosas roja, e nos ia era par planta un blanca. E si la Rea va descovre esta, on va destesti tota de nos, tu sabe. E alora, Seniora, tu vide, nos fa la plu bon cual nos pote, ante la ariva de la Rea, per –” A esta momento, Sinco, ci ia regarda ansiosa la otra lado de la jardin, esclama “La Rea! la Rea!” e, sin pausa, la tre jardinores lansa se a tera e reclina plata sur sua fases. On ave un sona de multe pasos, e Alisia turna sua regarda, zelosa per vide la Rea.

Des soldatos veni prima, portante spadas: tota de los ave la mesma forma como la tre jardinores, retangulo e plata, con sua manos e pedes a la angulos: la des conselores de corte segue: estas es covreda con diamantes ornante, e pasea en duples como la soldatos. Pos estas, la enfantes reial veni: on ave des de los, e la caras peti veni joiosa saltante con mano en mano, en duples: tota de los es ornada con cores. La invitadas segue, xef Res e Reas, e Alisia reconose la Coneo Blanca entre los: lo parla en un manera fretante e ansiosa, suriente a tota dises, e lo pasa Alisia sin vide el. Alora la Cavalor de Cores segue, portante la corona de la Re sur un cuxin de veluda carmesi; e, como la ultimas en esta prosegue grande, on ave LA RE E REA DE CORES.

Alisia no es serta esce el debe reclina sur sua fas como la tre jardinores, ma el no recorda oia a cualce tempo ce on ave un tal regula a un prosegue; “e plu, como un prosegue ta susede,” el pensa, “si tota la popla ta debe reclina sur sua fases, tal ce los no pote vide lo?” Donce el sta sur sua loca, e espeta.

Cuando la prosegue ariva ante Alisia, tota de los para e regarda el, e la Rea dise, sever: “Ci es esta?” El dise lo a la Cavalor de Cores, ci responde sola par inclina se e surie.

“Stupida!” la Rea dise, nonpasiente secutente sua testa, e, turnante a Alisia, el continua: “Cual es tua nom, enfante?”

“Mea nom es Alisia, per favore, Altia,” Alisia dise multe cortes; ma el ajunta, a se: “Vera, los es sola un colie de cartas, an tal. Me no nesesa teme los!”

“E ci es estas?” la Rea dise, indicante la tre jardinores ci reclina sirca la arboreta de rosas; car, tu vide, los reclina sur sua fases, e sua dorsos ave esata la mesma desinia como la otra cartas, donce el no pote deteta esce los es jardinores, o soldatos, o conselores de corte, o tre de sua propre enfantes.

“Perce me ta sabe?” Alisia dise, surprendeda par sua coraje. “Lo no conserna me.”

La Rea deveni carmesi en furia, e, pos un momento de regarda el, tan coler como un bestia savaje, comensa cria: “Destesti el! Des –”

“Riable!” Alisia dise, multe forte e desidosa, e la Rea silenti.

La Re pone sua mano sur la braso de la Rea, e dise timida: “Considera, mea cara: el es mera un enfante!”

La Rea turna coler de el, e dise a la Cavalor: “Turna los a supra!”

La Cavalor fa esta, en un modo multe atendosa, con un pede.

“Leva vos!” la Rea dise, en un vose xiliante e forte, e la tre jardinores salta pronto sur sua pedes, e comensa inclina se ante la Re, la Rea, la enfantes reial, e tota la otras.

“Sesa fa acel!” la Rea xilia. “Vos marea me.” E alora, turnante a la arboreta de rosas, el continua: “Ma vera, cual vos ia fa asi?”

“Per favore, Altia,” Du dise en un tono multe umil, basinte se sur un jeno a cuando el parla, “nos ia atenta –”

“Me vide!” la Rea dise, ci ia esamina ja entretempo la rosas. “Destesti los!” e la prosegue continua, lasante tre de la soldatos per esecuta la jardinores nonfortunosa, ci core a Alisia per proteje se.

“On no va destesti vos!” Alisia dise, e el pone los en un portaflor grande cual sta prosima. La tre soldatos vaga ambiente tra un o du minutos, xercante los, e marxa alora a via pos la otras.

“Esce vos ia destesti los?” la Rea cria.

“Sua testas ia parti, per favore, Altia!” la soldatos cria en responde.

“Perfeta!” la Rea cria. “Tu sabe jua croceta?”

La soldatos es silente, e regarda Alisia, car la demanda es evidente intendeda per el.

“Si!” Alisia cria.

“Donce veni!” la Rea ruji, e Alisia junta se a la prosegue, multe volente descovre cual cosa va aveni aora.

“Lo – lo es un dia multe bela!” un vose timida dise a sua lado. El pasea con la Coneo Blanca, ci fa regardetas ansiosa a sua fas.

“Multe,” Alisia dise. “Do es la Duxesa?”

“Xux! xux!” la Coneo dise en un tono basa e fretante. El regarda ansiosa supra sua spala cuando el parla, e alora leva se sur sua ditos de pedes, prosimi sua boca a la orea de Alisia, e xuxa: “On ia condena el a mori.”

“Perce?” Alisia dise.

“Esce tu ia dise ‘Triste!’?” la Coneo demanda.

“No, tota no,” Alisia dise. “Me no opina ce lo es triste. Me ia dise ‘Perce?’”

“El ia colpa la fas de la Rea –” la Coneo comensa. Alisia fa un xilia peti de rie. “O! xux!” la Coneo xuxa en un tono asustada. “La Rea va oia tu! Tu vide, el ia veni alga tarda, e la Rea ia dise –”

“Vade a vosa locas!” la Rea cria en un vose de tona, e la persones comensa core en tota dirijes, de asi a ala, cadente contra lunlotra: an tal, los deveni calma pos un o du minutos, e la jua comensa.

Alisia opina ce el ia vide nunca en sua vive un campo de croceta tan strana: lo conteni sola crestas e ranures: la bales de croceta es erisos vivente, e la marteles es flamingos vivente, e la soldatos debe curvi se e sta sur sua manos e pedes per deveni la arcos.

La problem xef cual Alisia trova prima conserna la maneja de sua flamingo: el susede pone la corpo de lo a via su sua braso, en un modo sufisinte comfortosa, con la gamas pendente, ma jeneral, apena pos cuando el reti bon la colo de lo e prepara colpa la eriso con la testa de lo, lo insiste torse se en la otra dirije per leva sua regarda a la fas de el, con un espresa tan confondeda ce el no pote evita esplode en rie; e, cuando el ia pone la testa de lo a su e es a punto de comensa denova, el es multe provocada par trova ce la eriso ia desrola se e es aora rampente a via: estra tota de esta, on ave jeneral un cresta o un ranur impedinte en cada dirije a cual el desira envia la eriso, e, car la soldatos curvida es sempre levante se e paseante a via a otra partes de la campo, Alisia veni pronto a la conclui ce la jua es vera multe difisil.

Tota la juores jua a la mesma tempo, sin alterna, sempre disputante e bataliante per controla la erisos; e, pos un tempo multe corta, la Rea es ja en un pasion furiosa, e vade piafante de asi a ala, e criante “Destesti esta om!” o “Destesti esta fem!” a sirca un ves en cada minuto.

Alisia comensa senti multe ansiosa: serta, el no ia fa ja un disputa con la Rea, ma el sabe ce lo pote aveni a cualce minuto, “e alora,” el pensa, “cual ta aveni a me? On gusta estrema multe destesti persones asi: la mervelia grande es ce an un person resta vivente!”

El regarda sirca se, xercante alga modo de evade, e demandante a se esce el pote fuji a via sin ce algun vide el, cuando el persepi un apare strana en la aira: prima, lo confonde multe el, ma pos un o du minutos de regarda lo, el persepi ce lo es un surie, e el dise a se: “Lo es la Gato de Cheshire: aora me va ave algun con ci me pote parla.”

“Tu susede en la jua?” la Gato dise, direta cuando sua boca sufisi per parla.

Alisia espeta asta la apare de la oios, e acorda alora con sua testa. “Me no va es beneficada par parla a lo,” el pensa, “asta la ariva de sua oreas, o de un de los, a la min.” Pos un otra minuto la testa intera apare, e Alisia pone alora sua flamingo sur la tera, e comensa raconta la jua, con un senti multe contente ce el ave algun ci escuta el. La Gato pare crede ce un cuantia bastante de sua corpo es aora vidable, e no plu partes de lo apare.

“Vera, me no opina ce on jua justa,” Alisia comensa, en un tono alga cexante, “e on disputa tan forte ce on no pote oia sua propre parlas – e on pare ave no regulas definida; a la min, si on ave regulas, cadun iniora los – e on ave un confusa tan noncredable car tota la ojetos es vivente: per esemplo, on ave ala la arco tra cual me debe aora envia mea bal, ma el pasea ja a la otra fini de la campo – e, a un momento ante aora, me ia debe fa un croceta a la eriso de la Rea, ma lo ia fuji cuando lo ia vide mea eriso prosiminte!”

“Esce tu gusta la Rea?” la Gato dise en un vose basa.

“Tota no,” Alisia dise: “el es vera tan –” Ma a esta momento el vide ce la Rea sta prosima pos el, escutante, donce el continua, “– capas de gania la jua ce nos nesesa apena fini lo.”

La Rea surie e pasa plu.

“Ma a ci tu parla?” la Re dise, prosiminte a Alisia, e regardante la testa de la Gato con curiosia grande.

“Lo es un ami de me – un Gato de Cheshire,” Alisia dise: “permete ce me presenta lo.”

“Me tota no gusta sua aspeta,” la Re dise: “an tal, me permete ce lo besa mea mano, si lo desira.”

“Me no desira,” la Gato comenta.

“Condui plu respetosa,” la Re dise, “e no regarda me en acel modo!” El asconde se pos Alisia en cuando el parla.

“Un gato pote regarda un re,” Alisia dise. “Me ia leje esta en alga libro, ma me no recorda do.”

“Vera, on debe move lo a via,” la Re dise multe desidosa; e el clama la Rea, ci pasa a esta momento: “Mea cara! Me vole ce tu comanda ce on sutrae esta gato!”

La Rea ave sola un metodo de solve tota problemes, grande o peti. “Destesti lo!” el dise, sin an regarda la situa.

“Me mesma va retrae la esecutor,” la Re dise zelosa, e el freta a via.

Alisia opina ce, egal bon, el ta revade per vide la progresa de la jua, car el oia distante la vose de la Rea, xiliante en pasion. El ia oia ja la Rea comandante la esecuta de tre de la juores car los ia oblida sua alternas, e el tota no gusta la aspeta de la situa, car la jua es en un confusa tan grande ce el sabe nunca cuando el debe jua e cuando no. Donce el vade a via per xerca sua eriso.

La eriso es ocupada en un batalia con un otra eriso, e Alisia opina ce la momento es eselente per fa un croceta a la un de los con la otra. La sola problem es ce sua flamingo ia traversa ja a la otra lado de la jardin, do Alisia pote vide ce lo atenta vola a la ramos de un arbor en un modo alga noncapas.

Cuando Alisia catura final la flamingo e retrae lo, la batalia es ja finida, e ambos erisos es ja ultra vista. “Ma esta no importa multe,” el pensa, “car tota la arcos ia parti ja de esta lado de la campo.” Donce el pone la flamingo a via su sua braso, afin lo no fuji denova, e revade per continua alga sua conversa con sua ami.

Cuando el reveni a la Gato de Cheshire, el es surprendeda par trova ce un fola grande ia asembla sirca lo: un disputa aveni entre la esecutor, la Re, e la Rea, de ci tota parla a la mesma tempo, tra cuando tota la otras es intera silente e aspeta multe noncomfortosa.

Direta a la apare de Alisia, tota de la tre apela a el per solve la problem, e los repete a el sua razonas, an si, car tota parla a la mesma tempo, el trova ce la taxe de reconose clar la parolas es vera multe difisil.

La razona de la esecutor es ce on no pote talia un testa a via si on no ave un corpo de cual lo ta es taliada; ce el ia debe nunca fa un tal cosa a ante, e ce el no intende comensa un tal cosa a sua eda.

La razona de la Re es ce on pote destesti cualce cosa cual ave un testa, e ce on no debe parla asurda.

La razona de la Rea es ce, si on no va solve la problem en min ca no tempo, el va comanda ce on esecuta cadun en la fola. (Esta ultima es la comenta cual ia dona un aspeta tan seria e ansiosa a la grupo intera.)

Alisia pote trova no frase plu conveninte per dise ca: “Lo parteni a la Duxesa: tu debe fa tua demandas a el.”

“El es en prison,” la Rea dise a la esecutor: “veni el asi.” E la esecutor parti como un flexa.

La testa de la Gato comensa desapare direta pos la parti de la esecutor, e, cuando el reveni con la Duxesa, la Gato es ja intera a via. Donce la Re e la esecutor core fol de asi a ala, xercante lo, en cuando la resta de la grupo revade a la jua.

© 2016 Elefen.org. Tota diretos de autor es reservada.