Alisia en la pais de mervelias

Capitol 4

La Coneo envia un Ben peti

La pasos es los de la Coneo Blanca, cual reveni lenta trotante, e ansiosa regardante sirca se, como si lo ia perde alga cosa; e el oia lo murmurante a se: “La Duxesa! la Duxesa! Ai! ma salva mea pedetas! E mea pelo e vibrisas! El va esecuta me, tan serta como furones es furones! Do me ia pote cade los, me vole sabe?” Alisia divina en un momento ce lo xerca la ventador e la duple de gantos blanca de capreta, e, multe aidosa, el comensa xerca los asi e ala, ma los no es vidable en cualce loca – lo pare ce tota ia cambia de pos sua nada en la stange; e la atrio grande, con la table de vitro e la porte peti, ia desapare completa.

Multe pronto, la Coneo vide Alisia xercante asi e ala, e clama el en un tono coler: “Ma vera, Mariana, perce tu sta asi a estra? Core ja a casa, e trae a me un duple de gantos e un ventador! Aora, rapida!” E Alisia es tan asustada ce el core sin pausa a via, en la dirije indicada par la Coneo, sin atenta esplica la era cual lo ia fa.

“Lo ia pensa ce me es sua servor,” el dise a se, en cuando el core. “Lo va es tan surprendeda cuando lo descovre ci me es! Ma la situa va es plu bon si me prende a lo sua ventador e gantos – a la min, si me pote trova los.” Cuando el dise esta, el ariva a un peti casa bonordinada, cual ave sur sua porte un placa de laton briliante con la nom “C. BLANCA” gravada sur lo. El entra sin bateta la porte, e freta a supra en un teme grande ce el va encontra la Mariana vera, e va es ejetada de la casa ante trova la ventador e gantos.

“Lo pare tan strana,” Alisia dise a se, “ce me fa misionetas per un coneo! Me suposa ce Dina va envia me a misionetas aora!” E el comensa imajina cual spesie de cosas ta pote aveni: “‘Senioreta Alisia! Veni direta asi, e prepara per un pasea!’ ‘Me va veni pos un minuto, Enfantor! Ma me debe vijila esta buco de mus asta la reveni de Dina, per serti ce la mus no sorti.’ Ma me no crede,” Alisia continua, “ce on ta lasa Dina resta en la casa si el ta comensa dona tal comandas a persones!”

Aora el trova ja sua via a un peti sala ordinosa con un table su la fenetra, e sur lo (como el ia espera) ave un ventador e du o tre duples pico de gantos blanca de capreta: el prende la ventador e un duple de la gantos, e es a punto de sorti de la sala, cuando sua regarda encontra un botela peti cual sta prosima a la miror. A esta ves, lo ave no eticeta con la parolas “BEVI ME”, ma el destapi lo, an tal, e pone lo a sua labios. “Me sabe serta ce alga cosa interesante va aveni,” el dise a se, “sempre cuando me come o bevi un cosa: donce me va proba rapida la efeto de esta botela. Me espera forte ce lo va regrandi me, car vera me es tota noiada par es tan peti e pico!”

E vera, esta aveni, e multe plu rapida ca el ia previde: ante bevi un dui de la botela, el trova ce sua testa es ja presada contra la sofito, e el nesesa inclina se per evita rompe sua colo. El desprende fretosa la botela, disente a se: “Acel basta ja – Me espera ce me no va crese plu – An aora, me no pote sorti tra la porte – Me desira forte ce me no ia bevi tan multe!”

Ai! lo es ja tro tarda per acel desira! El continua crese, e crese plu, e multe pronto el nesesa ajena sur la solo: pos un plu minuto, la spasio no sufisi an per esta, e el proba reclina se, presante un codo contra la porte e curvinte la otra braso sirca sua testa. Ancora el continua crese, e, par la recurso ultima, el sorti un braso tra la fenetra e pone un pede en la ximine, e dise a se: “Aora me pote fa no plu, an con tota cual pote aveni. Cual grandia me va ave final?”

Fortunosa per Alisia, la peti botela majiosa ia completi ja aora sua efeto, e el no grandi plu: an tal, la situa es multe noncomfortosa, e, car lo pare an tota nonposible ce el va pote denova estrae se de la sala, lo no es surprendente ce el senti nonfelis.

“Me ia gusta multe plu es a mea casa,” la povre Alisia pensa, “cuando me no ia deveni sempre plu grande e plu peti, su comandas de muses e coneos. Me desira cuasi ce me no ia desende en acel tunel de coneo – e an tal – an tal – esta spesie de vive es alga interesante, tu sabe! Vera, me vole sabe cual cosa ia aveni a me! Cuando me ia leje fables a ante, me ia suposa ce cosas de esta spesie aveni nunca, ma me es aora asi a media de un tal! On ta debe scrive un libro sur me, me declara! E cuando me es plu grande, me va scrive lo – ma me es aora ja grande,” el ajunta en un tono triste: “a la min, la spasio no sufisi asi per crese plu.”

“Ma alora,” Alisia pensa, “esce me va deveni nunca plu vea ca aora? A un lado, lo ta es un consola – me ta es nunca un fem vea – ma a la otra – me ta debe sempre aprende lesones! O! me no ta gusta acel!”

“O! Alisia, tu es fol!” el responde a se. “Como tu ta aprende asi lesones? Vera, la spasio sufisi apena per tu, e tota no per cualce libros de lesones!”

E el continua en esta modo, prendente aora la un opina, alora la otra, e el fa final un conversa alga longa sur la tema; ma pos alga minutos el oia un vose a estra, e sesa per escuta.

“Mariana! Mariana!” la vose dise. “Trae ja mea gantos a me!” On ave alora un tape peti de pedes sur la scalera. Alisia sabe ce la Coneo veni per xerca el, e el trema asta cuando el secute la casa, tota oblidante ce el es aora plu grande ca la Coneo a sirca mil veses, e ave no razona per teme lo.

La Coneo veni pronto a la porte, e atenta abri lo. Ma, car la porte abri interninte, e la codo de Alisia es forte presada contra lo, sua atenta no susede. Alisia oia lo disente a se: “Donce me va vade a la lado, e entra tra la fenetra.”

Acel no va aveni!” Alisia pensa, e, pos espeta asta cuando el crede oia la Coneo en ariva direta su la fenetra, el esvasa subita sua mano, e fa un saisi en la aira. El catura no cosa, ma el oia un xilia peti e un cade, e un pum de vitro rompeda, de cual el conclui ce lo es cisa posible ce la Coneo ia cade sur un inverneria de concombres, o un cosa simil.

A pos, un vose coler es oiable – lo de la Coneo – “Pedro! Pedro! Do tu es?” E alora un vose cual Alisia ia oia nunca a ante: “Ma me ’s asi, bon serta! Me ’scava la pomas, S’nior!”

“Escava la pomas, asurda!” la Coneo dise coler. “Veni asi, e aida me a estrae me de esta!” (Plu sonas de vitro rompeda.)

“Ma dise a me, Pedro, cual es acel a la fenetra?”

“Bon serta, lo ’s un braso, S’nior!” (El pronunsia “brazo”.)

“Un braso, fol! Ci ia vide ja un braso tan grande? Vera, lo ocupa la fenetra intera!”

“Bon serta, S’nior, ma lo ’s un braso, an tal.”

“Ba, ma me no permete ce lo resta ala, per cualce razona: vade! Move lo a via!”

On ave un silentia longa pos esta, e Alisia oia mera xuxas de ves a ves; como “Bon serta, me no gusta lo, S’nior, ma vera, ma vera!” e “Obedi mea comandas, coarde!”, e a fini el esvasa denova sua mano, e fa un saisi nova en la aira. A esta ves, on ave du xilias peti, e plu sonas de vitro rompeda. “Los debe ave tan multe invernerias de concombres!” Alisia pensa. “Me vole sabe cual cosa los va fa aora! Regardante la idea de estrae me tra la fenetra, me desira mera ce los ta pote! Me es serta ce me no vole resta plu en esta sala!”

El espeta tra alga tempo sin oia plu ruidos: a fini, on ave un ronca de rotas peti de caro, e la sona de vera multe voses ci parla tota a la mesma tempo: el deteta la parolas: “Do es la otra scala? – Vera, me ia debe trae sola un. Ben ave la otra – Ben! Trae lo asi, xico! – Veni, sta los a esta angulo – No, comensa par lia los la un a la otra – los no ave ancora un dui de la altia nesesada – Ma no, los basta ja. No esije tan – Vide, Ben! Catura esta corda – Esce la teto va suporta? – Atende la telia nonfisada! – O! lo desende! Garda vosa testas a su!” (un pum forte) “E ci ia fa acel? – Ben, me pensa – Ci va desende tra la ximine? – No, me no va fa! Tu va fa! – Bon serta, ma me no va fa ’cel! – Ben debe desende – ’scuta, Ben! La S’nior dise: tu va d’sende tra la x’mine!”

“O! donce Ben va desende tra la ximine, si?” Alisia dise a se. “Vera, los pare dona tota taxes a Ben! Me no ta vole es en sua situa an per un bon recompensa; esta ximineria es streta, serta; ma me crede ce me pote colpa alga con mea pede!”

El retira sua pede a tan basa en la ximineria como posible, e espeta asta oia un animal peti (el no pote divina de cual spesie lo es) ci rasca e trepa en la ximine, prosima supra el: alora, disente a se “Esta es Ben”, Alisia fa subita un colpa de pede, e pausa per vide cual cosa va aveni aora.

La cosa prima cual el oia es un coro jeneral de “Ben vade volante!” segueda par la vose solitar de la Coneo – “Catura el, asta la sepe, tu!” e un silentia a pos, e alora un confusa nova de voses – “Suporta sua testa – Alga coniac – No sofoca el – Como tu ia vade, bonom? Cual ia aveni a tu? Raconta tota a nos!”

A fini un peti vose debil (“Acel es Ben,” Alisia pensa) pia: “Vera, me sabe apena – No plu, grasias; me recovre ja – ma me es vera tro ajitada per raconta – me sabe sola esta – alga cosa ia veni a me com’ un diablo caxida, e me ia vade volante com’ un roceto!”

“Si, tu ia vola, bonom!” la otras dise.

“Nos debe ensende la casa!” la vose de la Coneo dise, e Alisia esclama tan forte como posible: “Si vos osa, me va envia Dina contra vos!”

On ave direta un silentia completa, e Alisia pensa a se: “Ma me vole sabe cual cosa los va fa en loca! Si los ta es intelijente, los ta abri la teto.” Pos un minuto o du, los comensa move denova, e Alisia oia la Coneo dise: “Un careta de los va sufisi per comensa.”

“Un careta de cual?” Alisia pensa. Ma sua demanda no dura longa, car, a la momento seguente, un duxi de calculos peti veni clicante tra la fenetra, e alga de los colpa el a sua fas. “Me va fa ce los sesa,” el dise a se, e esclama, “Vos va regrete si vos continua fa acel!”, e esta produi denova un silentia completa.

Alisia nota, con alga surprende, ce tota la calculos deveni tortetas en cuando los reposa sur la solo, e un idea astuta apare en sua testa. “Si me come un de esta tortetas,” el pensa, “lo es serta ce lo va cambia mea grandia en alga modo. E car me no pote imajina ce lo va fa ce me deveni plu grande, lo debe fa ce me deveni plu peti, me suposa.”

Donce el engoli un de la tortetas, e trova con deleta ce el comensa diminui sin retarda. Cuando el ateni un grandia conveninte per vade tra la porte, el sorti corente de la casa, e trova un fola notable de animales e avias peti ci espeta a estra. Ben, la povre Lezardo peti, es en la media, suportada par du cavias ci dona a el alga cosa de un botela. Tota de los freta per catura Alisia direta cuando el apare, ma el core tan rapida como posible a via, e trova pronto ce el es ja secur en un bosce densa.

“Mea taxe prima,” Alisia dise a se, vagante de asi a ala en la bosce, “es crese denova a mea grandia coreta; e mea taxe du es trova un via cual va gida me a acel jardin bela. Me crede ce esta projeta va susede la plu bon.”

Lo pare un projeta eselente, sin duta, con un forma multe bon e simple: la sola difisil es ce Alisia no sabe an la plu pico como el va comensa reali lo; e en cuando el sta e xerca ansiosa entre la arbores, un peti abaia agu, direta supra sua testa, fa ce el leva sua regarda en un freta grande.

Un caneta enorme regarda el de supra, con oios grande e ronda, e lo estende debil un pedeta, per atenta toca el. “Povre peti!” Alisia dise en un tono adulante, e el fa un atenta forte per sibila a lo; ma el es estrema asustada, an tra tota, par la pensa ce cisa lo es fame, e en acel caso lo pare multe probable ce lo va devora el an pos tota sua adulas.

Apena sabente lo cual el fa, el prende un peso peti de basto, e ofre lo a la caneta: a esta, la caneta salta en la aira par tota sua pedes a la mesma tempo, con un abaia de deleta, e lansa se a la basto, en jua de ataca lo: alora Alisia core pos un cardo grande, per evita es craseda; e, direta cuando el apare a la otra lado, la caneta lansa denova se a la basto, e cade voltante en sua zelo per oteni lo: alora Alisia, pensante ce esta es multe simil a jua con un cavalo de caro, e previdente a cada momento ce el va es craseda su la pedes de lo, core denova sirca la cardo: alora la caneta comensa un serie de atacas corta a la basto, tal corente a cada ves ce lo avansa pico e retira multe a pos, e roncin abaiante tra tota la tempo, asta cuando, a fini, lo senta se a un distantia grande, rapida respirante, con sua lingua pendente de sua boca, e partal cluinte sua oios grande.

Alisia opina ce esta es un bon momento per fa un fuji: donce el vade direta a via, e core asta cuando el es tota fatigada e sin aira, e asta cuando el oia apena la abaias de la caneta distante.

“E, an tal, lo ia es un caneta tan cara!” Alisia dise, apoiante contra un ranunculo per reposa, e ventinte se con un de la folias. “Me ta gusta multe ensenia trucos a lo, si – si mera mea grandia ta conveni per fa lo! Ai! me ia oblida cuasi ce me nesesa crese denova! Ta ce me pensa – como me pote reali lo? Me suposa ce me debe come o bevi alga cosa, ma la demanda xef es ‘Cual?’”

La demanda xef es serta “Cual?”. Alisia turna a tota dirijes, regardante la flores e la folias de erba sirca se, ma el pote vide no cosa cual aspeta bon per come o bevi en la situa. Un xampinion grande crese prosima a el, con un altia simil a el mesma; e, cuando el ia regarda su lo, e a ambos lados de lo, e pos lo, la pensa apare en sua mente ce el ta fa egal bon un videta per descovre cual cosa es supra lo.

El estende se sur sua ditos de pede, e regarda ultra la borda de la xampinion, e sua oios encontra direta los de un grande eruga blu, cual senta a supra, con sua brasos crusada, calma fuminte un pipa longa de acua, e an no pico reatante a el o a cualce otra cosa.

© 2017 Elefen.org. Tota diretos de autor es reservada.