Alisia en la pais de mervelias

Capitol 1

Tra la tunel de coneo

Alisia comensa deveni multe noiada, sentante a lado de sua sore sur la riva, con no cosa per ocupa se: a un o du veses, el ia regardeta en la libro cual sua sore leje, ma lo conteni no imajes o conversas, “e cual es la valua de un libro,” Alisia pensa, “sin imajes o conversas?”

Donce el es considerante, en sua mente (tan bon como posible, car el senti multe dormosa e stupida par causa de la dia calda), esce la plaser de crea un cadena de margaritas ta compensa per la labora de leva se e colie la margaritas, cuando subita un Coneo Blanca con oios ros pasa corente a sua lado.

No parte de esta es vera multe notable; e Alisia no trova ce lo es vera multe estracomun cuando el oia la Coneo disente a se: “Ai! ai! me va es tro tarda!” (cuando Alisia contempla esta a pos, lo pare a el ce el ia debe mervelia a lo, ma aora, a la momento de aveni, tota pare intera natural); ma, cuando la Coneo prende an un orolojeta de sua pox de jaceta, e regarda lo, e alora continua freta, Alisia salta sur sua pedes, car la pensa vola tra sua mente ce el ia vide ja nunca un coneo con o un pox de jaceta, o un orolojeta prendable de lo, e con curiosia ardente, el core pos lo en traversa de la campo, e ariva a la bon tempo per vide ce lo desapare su la sepe en un tunel grande de coneo.

En la momento seguente, Alisia entra pos lo, no considerante an pico como posible el va sorti denova.

La tunel estende direta a ante tra alga parte, como un tunel comun, e alora desende subita, tan subita ce Alisia ave an no un momento per considera para se, ante trova se en cade tra lo cual pare es un poso multe profonda.

O la poso es multe profonda, o Alisia cade multe lenta, car, en cuando el desende, el ave multe tempo per regarda sirca se, e per demanda cual cosa va aveni aora. Prima, el atenta regarda a su per persepi do el va ariva, ma la loca es tan oscur ce el vide no cosa: alora el regarda la lados de la poso, e trova ce los es plen de armarios e scafales de libros: asi e ala, el vide mapas e depintos pendente de caviles. El estrae un jar de un de la scafales en pasa: lo ave la eticeta “MARMELADA DE ORANIA”, ma a sua delude grande, lo es vacua: el no desira cade la jar, par causa de teme ce lo va mata algun a su, donce el susede pone lo en un de la armarios cuando el pasa.

“Bon!” Alisia pensa a se. “Pos un tal cade, me va es turbada a no grado par cade sur la scalera! Tota a casa va opina ce me es tan corajosa! Serta, me no va cexa, an pos cade de la teto de la casa!” (E multe probable, esta es vera.)

A su, a su, a su. Esce la cade va ateni nunca un fini? “Me vole sabe tra cuanto cilometres me ia cade ja,” el dise a vose. “Me suposa ce me es ja alga prosima a la sentro de la tera. Ta ce me recorda: acel es a ses mil cuatrosento cilometres de profondia, me crede –” (tu vide, Alisia ia aprende cosas diversa de esta spesie en sua lesones en la sala de scola, e an si esta momento no es multe bon per ostenta sua sabes, car no person es presente per escuta el, an tal, la repete de la informa es un bon eserse) “– si, acel es sirca la distantia coreta – ma aora, me vole sabe cual Latitude o Lonjitude me ia ateni.” (Alisia no ave un comprende pico de latitude, o an de lonjitude, ma el opina ce los es bon parolas grande per dise.)

Pos un tempo, el recomensa. “Me vole sabe esce me va cade direta tra la Tera! Tota va pare tan comica cuando me emerji entre la persones ci pasea con sua testas a su! La antipatias, me crede –” (a esta ves, el es alga contente ce nun escuta, car la sona de la parola no pare an pico coreta) “– ma me va debe demanda de los la nom de la pais, tu sabe. Per favore, seniora, esce me es en Zeland Nova? O Australia?” (e el atenta plia sua jenos en cuando el parla – imajina, plia sua jenos cuando on cade tra la aira! Tu pensa ce tu ta pote fa?) “E, par la demanda, el va opina ce me es un xica tan noninstruida! No, la demanda va conveni nunca: cisa me va vide la responde ja scriveda sur alga cosa.”

A su, a su, a su. El ave no otra cosa per ocupa se, donce pronto Alisia comensa denova parla. “Dina va es multe triste sin me a esta note, me suposa!” (Dina es la gato.) “Me espera ce on va recorda sua plateta de lete a la ora de come. Dina, mea cara! Me desira ce tu ta es asi a su con me! On ave no muses en la aira, me regrete, ma cisa tu ta catura ciroteros, e los es multe simil a muses, tu sabe. Ma me demanda: esce gatos come los?” E asi Alisia comensa deveni alga dormosa, e continua dise a se, en un modo soniosa, “Gatos come los? Gatos come los?” e a veses “Los come gatos?”, car, tu vide, el es egal noncapas de responde a ambos demandas, e donce la ordina de la parolas no es multe importante. El senti ce el adormi, e comensa sonia ce el pasea con Dina, con mano en mano, multe seria disente a el, “Bon, Dina, no menti a me: esce tu ia come ja un cirotero?”, cuando subita, pum! pum!, el desende sur un monton de bastos e folias seca, e la cade es pasada.

Alisia no es an pico ferida, e el salta sur sua pedes en un secondo: el leva sua regarda, ma tota a supra es oscur: ante el, on ave un otra pasaje longa, e la Coneo Blanca es ancora en vista, fretante a longo. Alisia no pote perde an un momento: el core tan rapida como la venta, e ariva a la bon tempo per oia lo disente, cuando lo verje a un angulo: “Ma salva mea oreas e vibrisas! La ora deveni tan tarda!” El segue ja prosima lo cuando el ateni la angulo, ma la Coneo no es vidable a ultra: el trova se en un atrio longa e basa, cual es luminada par un linia de lampas pendente de la teto.

On ave multe portes sirca la atrio, ma tota es clavida; e pos vade longo tota la via de un lado e reveni longo la otra, probante cada porte, el pasea triste longo la media, demandante a se como el va susede an sorti denova.

Subita el descovre un table peti con tre gamas, intera composada de vitro solida: no cosa es sur lo estra un clave pico de oro, e la idea prima de Alisia es ce cisa lo parteni a un de la portes de la atrio; ma, ai! o la securadores es tro grande, o la clave es tro peti, ma, per esta razona o acel, lo no abri an un de los. An tal, en sua sirculi du, Alisia descovre un cortina basa cual el no ia persepi a ante, e pos lo on ave un porte peti con sirca cuatrodes sentimetres de altia. El proba la clave peti de oro en la securador, e a sua deleta grande, lo conveni!

Alisia abri la porte e trova ce lo gida a un pasaje peti, no multe plu grande ca un tunel de rata: el ajena se e regarda longo la pasaje a la jardin la plu bela cual on pote imajina. El anela tan sorti de esta atrio oscur, e vaga entre acel fondos de flores colorosa e acel fontes fresca, ma el no pote an pone sua testa tra la porte; “e an si mea testa ta pote entra,” la povre Alisia pensa, “lo ta es apena usosa sin mea spalas. O! me desira tan ce me ta pote lisca a su como un telescopio! Me pensa ce me ta pote fa, si me ta sabe sola la modo de comensa.” Tu vide, tan multe cosas estracomun ia aveni resente, ce Alisia comensa ja pensa ce estrema poca cosas es vera nonposible.

Lo pare ce el no es beneficada par espeta ante la porte peti, donce el revade a la table, esperante partal ce cisa el va trova un otra clave sur lo, o a la min un libro de regulas per lisca persones a su como telescopios: a esta ves, el trova sur lo un botela peti (“me es serta ce lo no ia es asi a ante,” Alisia dise), e, liada sirca la colo de la botela, on ave un eticeta de paper, sur cual la parolas “BEVI ME” es bela primida en leteras grande.

La consela “Bevi me” pare tota bon, ma la peti Alisia saja no intende fa esta sin pausa. “No, me va regarda prima,” el dise, “e vide esce lo ave la avisa ‘Venena’ o no”: tu vide, el ia leje alga naretas bela sur enfantes ci deveni ardeda, e devorada par bestias savaje, e otra cosas desplasente, sola car los no ia recorda la regulas simple cual sua amis ia ensenia a los: per esemplo, ce un tisafoco de caldia roja va arde on si on teni lo tra un tempo tro longa; e ce, si on talia multe profonda sua dito con un cotel, lo sangui usual; e el oblida nunca ce, si on bevi multe de un botela con la avisa “Venena”, lo es cuasi serta ce lo va produi un mal efeto, aora o plu tarda.

Ma esta botela no ave la avisa “Venena”, donce Alisia osa proba lo, e trovante ce lo es multe bon (lo ave, en fato, un sabor de un spesie miscada de tarte de serisa, crema de ovos, ananas, pavo rostada, caramel dur, e pan tostada burida), el fini multe pronto bevi lo.

“Un senti tan strana!” Alisia dise. “Me pare lisca a su como un telescopio!”

E vera, esta aveni: el ave aora sola dudes-sinco sentimetres de altia, e sua fas deveni joiosa a la pensa ce el ave aora la grandia conveninte per vade tra la porte peti a acel jardin bela. An tal, prima, el espeta tra alga minutos per vide esce el va diminui an plu: el senti alga ansiosa sur esta; “car final, tu sabe,” Alisia dise a se, “me ta pote es intera estinguida, como un candela. Me vole sabe: como me ta aspeta alora?” E el atenta imajina la aspeta de la flama de un candela pos la estingui de la candela, car el no pote recorda ce el ia vide un tal cosa a cualce ves.

Pos un tempo, trovante ce no otra cosa aveni, el deside vade direta a la jardin; ma ai! la povre Alisia! Cuando el ariva a la porte, el trova ce el ia oblida la clave peti de oro, e cuando el revade a la table per prende lo, el trova ce el no pote ateni lo en cualce modo: lo es tota clar vidable tra la vitro, e el fa un atenta tan bon como posible per asende un de la gamas de la table, ma lo es tro liscosa; e pos fatiga se par sua atentas, la povre xica peti senta se e plora.

“Ma ba, un tal plora no benefica me!” Alisia dise a se en un vose alga sever. “Me recomenda ce tu sesa a esta momento!” Jeneral, la recomendas cual el dona a se es multe bon (an si cuasi nunca el segue los), e a veses el reproxa se en un modo tan sever ce larmas apare en sua oios; e el recorda ce, a un ves, el ia atenta colpa sua propre fas pos froda se en un jua de croceta cual el fa contra se, car esta enfante nonusual gusta multe finje ce el es du persones. “Ma me no es aora beneficada,” la povre Alisia pensa, “par finje ce me es du persones! Vera, la parte de me cual resta ta sufisi apena per formi an un person respetable!”

Pronto, sua regarda encontra un caxa peti de vitro cual reposa su la table: el abri lo, e trova en lo un torta multe peti, sur cual la parolas “COME ME” es bela scriveda con uvas seca. “Bon, me va come lo,” Alisia dise, “e si lo fa ce me deveni plu grande, me va pote ateni la clave; e si lo fa ce me deveni plu peti, me va pote rampe su la porte: donce me va ateni la jardin en esta modo o acel, e la manera mesma no conserna me!”

El come un peso peti, e dise ansiosa a se “Cual dirije? Cual dirije?”, teninte sua mano a la culmina de sua testa per senti en cual dirije lo move; e el es tota surprendeda par trova ce el reteni la mesma grandia. Serta, esta es jeneral lo cual aveni cuando on come un torta; ma Alisia deveni ja tan abituada a la idea ce la sola cosas cual va aveni es estracomun, ce lo pare vera noiante e stupida cuando la vive continua en la modo comun.

Donce el comensa la taxe, e come pronto la torta intera.

© 2016 Elefen.org. Tota diretos de autor es reservada.